ఆగ్నేయాసియాలో కరోనా తగ్గుముఖం- కారణం భారత్!

ఆగ్నేయాసియాలో కరోనా కేసుల సంఖ్య మే నెలతో పోలిస్తే తగ్గుముఖం పట్టిందని డబ్ల్యూహెచ్ఓ తెలిపింది. భారత్​తో పాటు మయన్మార్, ఇండోనేసియా దేశాల్లోనూ క్రమంగా కేసులు తగ్గుతున్నాయని పేర్కొంది. కాగా, ప్రపంచవ్యాప్తంగా 185 దేశాల్లో ఆల్ఫా వేరియంట్ బయటపడ్డట్లు వెల్లడించింది.

ఆగ్నేయాసియాలో కరోనా కేసుల సంఖ్య గత నెల రోజుల నుంచి స్థిరంగా ఉందని ప్రపంచ ఆరోగ్య సంస్థ వెల్లడించింది. మేలో నమోదైన తీవ్రస్థాయి నుంచి కోలుకుంటోందని తెలిపింది. ఇందుకు భారత్​లో కరోనా కేసులు తగ్గడమే కారణమని స్పష్టం చేసింది. మయన్మార్, ఇండోనేసియా దేశాల్లోనూ క్రమంగా కేసులు తగ్గుతున్నాయని పేర్కొంది.

ఈ మేరకు ఆగస్టు 10 కరోనా వారం నివేదికను విడుదల చేసిన డబ్ల్యూహెచ్ఓ.. ఆగ్నేయాసియాలో ఏడు రోజుల వ్యవధిలో 7.99 లక్షల కేసులు నమోదయ్యాయని తెలిపింది. అంతకుముందు వారంతో పోలిస్తే ఇవి ఐదు శాతం తక్కువ అని పేర్కొంది. అయితే, శ్రీలంక(26 శాతం పెరుగుదల), థాయ్​లాండ్(20 శాతం) వంటి దేశాల్లో కేసులు పెరిగాయని వెల్లడించింది.

అత్యధిక కేసులు నమోదైన దేశాలు

• భారతదేశం: 2,78,631 (రెండు శాతం తగ్గుదల)
• ఇండోనేసియా: 2,25,635 (18 శాతం తగ్గుదల)
• థాయ్​లాండ్: 1,41,191 (20 శాతం పెరుగుదల)

అత్యధిక మరణాలు నమోదైన దేశాలు

• ఇండోనేసియా: 11,373 (8 శాతం పెరుగుదల)
• ఇండియా: 3511 (8 శాతం తగ్గుదల)
• మయన్మార్: 2045 (22 శాతం తగ్గుదల)

20 కోట్లు

మరోవైపు, ప్రపంచవ్యాప్తంగా కరోనా కేసుల సంఖ్య 20 కోట్లు దాటిందని డబ్ల్యూహెచ్ఓ వివరించింది. కేసుల సంఖ్య 10 కోట్ల నుంచి 20 కోట్లకు చేరేందుకు ఆరు నెలలే పట్టిందని పేర్కొంది. మొత్తంగా వారం రోజుల వ్యవధిలో 42 లక్షల కేసులు, 65 వేలకు పైగా మరణాలు నమోదైనట్లు స్పష్టం చేసింది. ఒక్క అమెరికా నుంచే 734,354(35 శాతం) కేసులు వచ్చాయని తెలిపింది.

ప్రపంచవ్యాప్తంగా ఆల్ఫా వేరియంట్ 185 దేశాల్లో బయటపడ్డట్లు డబ్ల్యూహెచ్ఓ నివేదిక వెల్లడించింది. 142 దేశాల్లో డెల్టా, 136 దేశాల్లో బీటా, 81 దేశాల్లో గామా వేరియంట్ కేసులు గుర్తించినట్లు తెలిపింది.

ఇదీ చదవండి:అమెరికాలో కరోనా ఉగ్రరూపం- చైనాలో ఇళ్లకు తాళాలు