అమెరికాలో చైనా ప్రత్యక్ష పెట్టుబడుల్లో భారీ క్షీణత

అమెరికాలో చైనా ప్రత్యక్ష పెట్టుబడులు రికార్డ్​ స్థాయిలో క్షీణించినట్లు ఓ నివేదిక వెల్లడించింది. 2009 ఆర్థిక మాంద్యం తర్వాత 2019లోనే కనిష్ఠానికి పడిపోయినట్లు స్పష్టం చేసింది. ఈ ఏడాది కూడా జనవరి-మార్పి మధ్య అమెరికాలో చైనా ప్రత్యక్ష పెట్టుబడులు సుమారు 200 మిలియన్​ డాలర్లు తగ్గాయని తెలిపింది.

ప్రపంచంలో అమెరికా, చైనాలు రెండు అతిపెద్ద ఆర్థిక వ్యవస్థలు. వాటి మధ్య వాణిజ్యం, పెట్టుబడులు కూడా అదే స్థాయిలో ఉంటాయి. అయితే.. 2009లో వచ్చిన ఆర్థిక మాంద్యం తర్వాత గత ఏడాది అమెరికాలో చైనా ప్రత్యక్ష పెట్టుబడులు రికార్డ్​ స్థాయిలో క్షీణించినట్లు ఓ నివేదిక తేల్చింది. కరోనాతో ప్రపంచ దేశాల మధ్య వాణిజ్యం నిలిచిపోవడానికి ముందే.. ఈ స్థాయిలో పెట్టుబడులు తగ్గిపోవటం ఇరు దేశాల మధ్య ఉద్రిక్తతలు, విదేశాల్లో పెట్టుబడులపై చైనా ఆంక్షలను ప్రతిబింబిస్తోందని తెలిపింది.

అమెరికా-చైనా సంబంధాల జాతీయ కమిటీ, రోడియం సలహా బృందం సంయుక్తంగా నివేదిక రూపొందించింది.

" అమెరికాలో చైనా పెట్టుబడులు 2018 (5.4 బిలియన్​ డాలర్లు)తో పోలిస్తే 2019లో 5 బిలియన్​ డాలర్లకు తగ్గిపోయాయి. 2009 మాంద్యం తర్వాత ఇదే కనిష్ఠం. కరోనా మహమ్మారి కారణంగా ప్రపంచ ఆర్థిక వ్యవస్థపై తీవ్ర ప్రభావం పడింది. ఈ కారణంగా ఈ ఏడాది జనవరి-మార్పి మధ్య అమెరికాలో చైనా ప్రత్యక్ష పెట్టుబడులు సుమారు 200 మిలియన్​ డాలర్లు తుడిచిపెట్టుకుపోయాయి."

- నివేదిక

అమెరికా పెట్టుబడుల్లో వృద్ధి

మరోవైపు.. చైనాలో అమెరికా పెట్టుబడులు 2018 (12 బిలియన్​ డాలర్లు)తో పోలిస్తే గత ఏడాది 14 బిలియన్​ డాలర్లకు పెరిగిందని తెలిపింది. షాంఘైలోని టెస్లా ప్రాజెక్టు సహా గతంలో ప్రకటించిన ప్రాజెక్టులతోనే ఈ పెరుగుదల నమోదైనట్లు వివరించింది. అయితే.. రెండు వైపుల పెట్టుబడులు ఏడేళ్ల కనిష్ఠానికి పడిపోయినట్లు తేల్చింది.

అమెరికా సాంకేతికతను చైనా అక్రమంగా పొందేందుకు ప్రయత్నిస్తుందనే భయాలతో ఆ దేశ పెట్టుబడులపై అగ్రరాజ్య అధికారులు కఠినంగా వ్యవహరించటమే ఇందుకు కారణంగా పేర్కొంది నివేదిక.