రెచ్చిపోయిన ఉన్మాది.. ఇద్దరు చిన్నారులు మృతి

చైనాలో పిల్లలు ఆడుకునే ప్రదేశంలోకి చొరబడి కత్తితో దాడి చేశాడో కిరాతకుడు. ఈ ఘటనలో ఇద్దరు పిల్లలు మృతిచెందగా మరో 16 మందికి తీవ్ర గాయాలయ్యాయి.

చైనాలో చిన్న పిల్లలపై కత్తితో దాడులకు తెగబడ్డాడో వ్యక్తి. గ్వాంగ్జీ జువాంగ్​ రాష్ట్రం.. బైలూ నగరంలోని కిండర్ గార్డెన్​లో బుధవారం మధ్యాహ్నం ఈ ఘాతుకం జరిగినట్లు షిన్హువా న్యూస్ ఏజెన్సీ తెలిపింది.

బాలల గృహంలోకి కత్తితో ప్రవేశించిన దుండగుడు ఈ దాడికి తెగబడ్డాడు. ఘటనలో ఇద్దరు పిల్లలు మరణించగా.. మరో 16 మంది గాయపడ్డారని చైనా ప్రభుత్వ మీడియా తెలిపింది. ఇందులో ఇద్దరి పరిస్థితి విషమంగా ఉన్నట్లు తెలుస్తోంది. దాడికి పాల్పడిన నిందితుడిని పోలీసులు అరెస్టు చేశారు.

కత్తులతోనే..

కొన్నేళ్లుగా చైనాలో ఈ తరహా దాడులు పెరిగిపోయాయి. మానసిక అనారోగ్యంతో సతమతమయ్యే వారు.. వ్యక్తిగతంగా పగ పెంచుకునే వ్యక్తులు ఈ ఘాతుకాలకు పాల్పడుతుంటారని నిపుణులు తెలిపారు.

దేశంలో తుపాకులపై కఠిన ఆంక్షలు ఉన్నప్పటికీ.. కత్తుల వాడకాన్ని నియంత్రించలేకపోతోంది చైనా. ఈ తరహా దాడుల్లో ఎక్కువగా కత్తులే వినియోగించడం గమనార్హం.

ఇవీ చదవండి:'భారత్​ను దెబ్బకొట్టేందుకు​ చైనా కొత్త ఎత్తులు'