రసాయన కర్మాగారంలో పేలుడు- 47 మంది మృతి

తూర్పు చైనాలోని ఓ రసాయన కర్మాగారంలో భారీ పేలుడు సంభవించింది. విస్ఫోటనం తీవ్రతతో ఫ్యాక్టరీలోని భవనాలు కూలిపోయాయి. ఈ ఘటనలో 47 మంది మరణించారు. 90 మంది పరిస్థితి విషమంగా ఉంది.

తూర్పు చైనాలో జరిగిన రసాయన పేలుడులో మృతుల సంఖ్య 47కు పెరిగింది. జియాంగ్​సూ రాష్ట్రం యాంచెంగ్ లోని ఓ రసాయన కర్మాగారంలో ప్రమాదకర రసాయనం బెంజీన్​ కారణంగా ఈ భారీ విస్ఫోటనం సంభవించింది. పేలుడు ధాటికి ఫ్యాక్టరీలోని భవనాలు కుప్పకూలాయి. ఈ ఘటనలో మరో 90 మంది క్షతగాత్రులయ్యారు.

గాయపడిన వారిలో విద్యార్థులూ ఉన్నారు. ఘటనా స్థలానికి సమీపంలో పదికిపైగా పాఠశాలలు ఉన్నాయి. వీటిని అధికారులు మూసేశారు.

రసాయనాల కారణంగా ఆ ప్రాంతమంతా దట్టమైన పొగ కమ్మేసింది. పేలుడు అనంతరం స్పల్ప స్థాయిలో ప్రకంపనలు వచ్చినట్లు స్థానికులు చెబుతున్నారు.

ఇదీ చూడండి:కురువృద్ధ నేతను పక్కనబెట్టారా? అడ్వాణీ దారెటు?