వాణిజ్య యుద్ధం: డబ్ల్యూటీఓకు చైనా ఫిర్యాదు

అమెరికా-చైనా మధ్య నెలకొన్న వాణిజ్య యుద్ధం నానాటికీ పెరుగుతోంది. తాజాగా ఈ విషయంపై డబ్ల్యూటీఓను ఆశ్రయించింది డ్రాగన్​ దేశం. అగ్రరాజ్యం తనకు ఇష్టానుసారంగా ప్రవర్తిస్తూ... తమ వస్తువులపై సుంకాలను భారీగా పెంచుతోందని ఆరోపించింది. వివాద పరిష్కారానికే డబ్ల్యూటీఓలో ఫిర్యాదు చేసినట్టు స్పష్టం చేసింది చైనా.

అమెరికాతో జరుగుతున్న వాణిజ్య యుద్ధంలో ప్రపంచ వాణిజ్య సంస్థ(డబ్ల్యూటీఓ)ను ఆశ్రయించింది చైనా. తమ వస్తువులపై అమెరికా ఇష్టానుసారంగా సుంకాలు పెంచుతోందని డబ్ల్యూటీఓకు ఫిర్యాదు చేసింది డ్రాగన్​ దేశం. అమెరికా తాజాగా విధించిన బిలియన్​ డాలర్ల సుంకాలు అమల్లోకి వచ్చిన కొన్ని గంటలకే చైనా డబ్ల్యూటీఓలో ఈ అంశాన్ని లేవనెత్తింది.

దాదాపు ఏడాదిగా సాగుతున్న అమెరికా-చైనా వాణిజ్య యుద్ధం ప్రపంచదేశాలపైనా ప్రభావం చూపుతోంది. ఇటీవలి కాలంలో వీరి మధ్య సుంకాల పెంపుపై నువ్వా-నేనా అన్నంతగా పోటీ జరుగుతోంది.

ఒసాకాలో ఇరుదేశాల మధ్య కుదిరిన ఒప్పందాన్ని అమెరికా ఉల్లంఘించినట్టు డ్రాగన్​ దేశం ఆరోపించింది. డబ్ల్యూటీఓ నిబంధనల మేరకు తమ చట్టబద్ధమైన హక్కులు, ప్రయోజనాల పరిరక్షణకు కట్టుబడి ఉన్నట్లు తెలిపిన చైనా.....ఈ వివాద పరిష్కారం కోసమే అమెరికాపై ఫిర్యాదు చేసినట్లు పేర్కొంది.

ఇదీ చూడండి- హాంకాంగ్​: విద్యార్థుల నిరసనలతో నేతలపై ఒత్తిడి