సరిహద్దు సమస్యలకు సంబంధించి నేపాల్ వెనక్కు తగ్గింది. కొన్ని ప్రాంతాలపై నెలకొన్న వివాదాల పరిష్కారాలపై చర్చలకు సంబంధించి భారత్ స్పందన కోసం ఎదురుచూస్తున్నామని నేపాల్ విదేశాంగ మంత్రి ప్రదీప్ గ్యావలీ స్పష్టం చేశారు.
ఓ ఆంగ్ల వార్తాసంస్థతో మాట్లాడిన ప్రదీప్.. గతేడాది నవంబర్, డిసెంబర్తోపాటు మేలోనూ చర్చలకు భారత్ను ఆహ్వానించినట్లు తెలిపారు.
"మేం సమయం ఇచ్చాం. ఇప్పటికీ ఈ సమస్యలపై చర్చల ద్వారా పరిష్కించుకోవాలని నేపాల్ కోరుకుంటోంది. భారత్ స్పందన కోసం మేం ఎదురుచూస్తున్నాం. సాధారణ చర్చలతో ప్రత్యేకమైన భాగస్వామ్యాన్ని నిర్మించుకోవాలని ప్రయత్నస్తున్నాం."
- ప్రదీప్ గ్వావలి, నేపాల్ విదేశాంగ మంత్రి
లిపులేఖ్ రోడ్డుతో వివాదం ప్రారంభం..
భారత్ టిబెట్ మధ్య దూరాన్ని తగ్గించేందుకు లిపులేఖ్ కనుమ వరకు నిర్మించిన 80 కిలోమీటర్ల రోడ్డును ఇటీవల రక్షణ మంత్రి రాజ్నాథ్ సింగ్ ప్రారంభించారు. హిమాలయాల్లోని మూడు దేశాల సరిహద్దు ప్రాంతాలను కలిపే ఈ ప్రాంతంలో రహదారి ప్రారంభించటం వల్ల భారత్, నేపాల్ మధ్య ఉద్రిక్తతలు ప్రారంభమయ్యాయి.
ఈ నిర్మాణాన్ని నేపాల్ తీవ్రంగా వ్యతిరేకించింది. భారత్ ఆక్రమణకు పాల్పడుతోందని వాదించింది. ఈ నేపథ్యంలోనే కొన్ని వివాదాస్పద భూభాగాలను తమ దేశంలో కలుపుతూ నేపాల్ ప్రధాని ఖడ్గ ప్రసాద్ శర్మ ఓలీ జాతీయ పటాన్ని విడుదల చేశారు.
ఇప్పటివరకు వలస పాలనలో లేని నేపాల్ 1816లో సుగౌలీ ఒప్పందం ప్రకారం లింపియాధురా, కాలపానీ, లిపులేఖ్ ప్రాంతాలు తమ భూభాగాలని వాదిస్తోంది. అయినప్పటికీ చైనాతో యుద్ధం తర్వాత 1962 నుంచి ఈ ప్రాంతాలు భారత బలగాల అధీనంలోనే ఉన్నాయి.
కరోనాతో ఆటంకం?
దేశంలో కరోనా వైరస్ వ్యాప్తి నియంత్రణలోకి వచ్చేంత వరకు నేపాల్తో చర్చలకు భారత్ సిద్ధంగా లేదని సమాచారం. ఈ విషయంపై స్పందించిన ప్రదీప్.. ఒకవేళ చర్చలకు కరోనా ఆటంకం ఏర్పరిస్తే రహదారి ప్రారంభానికి ఎందుకు అడ్డుపడలేదని ప్రశ్నించారు.
"ఇరు దేశాల మధ్య స్నేహపూర్వక చర్చలకు మించిన ప్రత్యామ్నాయం లేదు. అయితే ఈ చర్చలు నామమాత్రంగా కాకుండా పరిష్కారం లభించే విధంగా ఉండాలి. పరస్పర ప్రయోజనాలను కాపాడే విధంగా ఇరు దేశాలు మధ్య వాతావరణం నెలకొనాలి. ఫలితంగా దక్షిణాసియా ప్రాంతంలో భారత్, నేపాల్ మైత్రి కొనసాగాలి."
- ప్రదీప్ గ్వావలీ
