శ్రీలంకలో వరుస పేలుళ్లు- 140 మంది మృతి

ఈస్టర్​ పర్వదినాన శ్రీలంకలో పెనువిషాదం. చర్చిలు, హోటళ్లలో జరిగిన 6 వరుస బాంబు పేలుళ్లకు 140 మంది బలయ్యారు. దాదాపు 400మందికి పైగా గాయపడ్డారు.

వరుస బాంబు పేలుళ్లతో శ్రీలంక దద్దరిల్లింది. ఈస్టర్​ పర్వదినాన పర్యటకుల తాకిడి ఎక్కువగా ఉండే చర్చిలు, ఫైవ్ స్టార్​ హోటళ్లే లక్ష్యంగా దాడులు జరిగాయి. రాజధాని కొలంబొ సహా మరికొన్ని పట్టణాల్లోని 3 చర్చిలు, 3 హోటళ్లలో బాంబులు పేలాయి. ఈ పేలుళ్లలో 140 మంది మృతి చెందారు. 400 మందికిపైగా గాయాలపాలయ్యారు.

ప్రార్థనలు జరుగుతుండగా...

క్రీస్తు పునరుత్థాన దినం సందర్భంగా ప్రత్యేక ప్రార్థనల కోసం అనేక మంది ప్రజలు చర్చిలకు తరలివచ్చారు. ఉదయం 8 గంటల 45 నిమిషాలకు కొచ్చికాడేలోని సెయింట్​ ఆంటోనీ చర్చిలో ఒక్కసారిగా బాంబు పేలింది. అనేక మంది గాయపడ్డారు. కొందరు అక్కడికక్కడే ప్రాణాలు కోల్పోయారు. పేలుడు ధాటికి చర్చి భవనం దెబ్బతింది.

నెగోంబో పట్టణంలోని సెయింట్​ సెబాస్టియన్​ చర్చి, బట్టికలోవా పట్టణంలోని మరో చర్చిలోనూ బాంబులు పేలాయి.

చర్చిలో దాడి జరిగిందని, వచ్చి సహాయపడాలని సెయింట్​ సెబాస్టియన్​ చర్చి పేలుళ్ల బాధితుల్లో ఒకరు ఫేస్​బుక్​ ద్వారా అభ్యర్థించారు.

హోటళ్లలో...

షాంగ్రీలా, సినమన్​ గ్రాండ్​, కింగ్స్​బరీ ఫైవ్ స్టార్​ హోటళ్లలోనూ దాడులు జరిగాయి.

వందల సంఖ్యలో...

దాడుల సమాచారంతో ప్రభుత్వ యంత్రాంగం అప్రమత్తమైంది. వెంటనే సహాయ సిబ్బందిని రంగంలోకి దింపింది. దేశవ్యాప్తంగా భద్రతను కట్టుదిట్టం చేసింది.

భారత్​ అప్రమత్తం...

శ్రీలంకలో దాడులపై భారత విదేశాంగ మంత్రి సుష్మాస్వరాజ్​ ట్వీట్​ చేశారు. కొలంబొలోని భారత రాయబారితో సంప్రదింపులు జరుపుతున్నట్లు తెలిపారు.