ఆ దేశంలో విమాన సర్వీసులు పునఃప్రారంభం

6 నెలల సుదీర్ఘ కాలం తర్వాత అంతర్జాతీయ విమాన సర్వీసులను గురువారం నుంచి తిరిగి ప్రారంభిస్తున్నట్లు తెలిపింది చైనా. ఆ దేశ రాజధాని బీజింగ్​ నుంచి ఎనిమిది దేశాలకు విమానాలను అనుమతిస్తున్నట్లు వెల్లడించింది. తమ దేశానికి వచ్చే ప్రయాణికులు తప్పనిసరిగా కార్వంటైన్​లో ఉండాలని పేర్కొంది.

కరోనా కారణంగా మూసివేసిన అంతర్జాతీయ విమాన సర్వీసులను ఆరు నెలల సుదీర్ఘ కాలం తర్వాత తిరిగి ప్రారంభిస్తున్నట్లు చైనా తెలిపింది. ఆ దేశ రాజధాని బీజింగ్​ నుంచి మిత్రదేశమైన పాక్​తో సహా ఎనిమిది దేశాలకు విమానాలను గురువారం నుంచి అనుమతిస్తున్నట్లు ప్రకటించింది.

బీజింగ్​ నుంచి మొదటి ఎయిర్​ చైనా విమానం కాంబోడియా రాజధానికి​ బయలుదేరనున్నట్లు వెల్లడించారు ఆ దేశ అధికారులు. ఆసియాలో థాయ్‌లాండ్, కంబోడియా, పాకిస్థాన్‌కు.. అలాగే ఐరోపాలోని గ్రీస్, డెన్మార్క్, ఆస్ట్రియా, స్వీడన్​లకు సర్వీసులను పునరుద్ధరించనున్నారు. ఉత్తర అమెరికాలో కెనడాతో పాటు తక్కువ సంఖ్యలో కరోనా కేసులు ఉన్న దేశాలకు సర్వీసులు తిరిగి ప్రారంభమవుతాయని పేర్కొంది.

విదేశాల్లో ఉన్న చైనీయులను తిరిగి స్వదేశానికి రప్పించేందుకు వివిధ దేశాల నుంచి షాంఘై, ఇతర నగరాలకు విమాన సర్వీసులను చైనా క్రమంగా అనుమతిస్తోంది.

ఇతర దేశాల నుంచి చైనా వచ్చే ప్రయాణికులు తప్పనిసరిగా 14 రోజుల పాటు క్వారంటైన్​లో ఉండాలని, అలాగే ఇతర వైద్య పరీక్షలు చేయించుకోవాలని బీజింగ్ ఆరోగ్య అధికారం ప్రతినిధి గావో జియాజున్ స్పష్టం చేశారు.