అఫ్గానిస్థాన్ను షరియా చట్టానికి(sharia rules) అనుగుణంగా పరిపాలిస్తామని తాలిబన్లు తేల్చి చెప్పారు. మంగళవారం తాత్కాలిక ప్రభుత్వాన్ని(Afghanistan Interim Government) ఏర్పాటు చేసిన వారు పరిపాలనా విధానంపై కీలక ప్రకటన చేశారు. ఈ ప్రకటన తాలిబన్‌ సుప్రీం లీడర్‌(Taliban Supreme Leader) మౌల్వీ హిబైతుల్లా అఖుంద్‌జాదా పేరుతో వెలువడింది.
"ఎవరూ భవిష్యత్తు గురించి ఆందోళన చెందవద్దు. అన్ని సమస్యలను సరైన మార్గంలో పరిష్కరిస్తాం. గత 20 ఏళ్లుగా రెండు లక్ష్యాలతోనే మేము పనిచేశాం. అఫ్గాన్‌ గడ్డపై నుంచి విదేశీ సేనలను పంపించి వేయడం ఒకటి కాగా.. దేశంలో పూర్తి స్థాయి సుస్థిర ఇస్లామిక్ వ్యవస్థను ఏర్పాటు చేయడం రెండోది. దీని ఆధారంగా భవిష్యత్తులో దేశ పాలన, అఫ్గాన్ల జీవితాలను ఇస్లామిక్ చట్టమైన షరియాను(Sharia Laws) అనుసరించి క్రమబద్ధీకరిస్తాం" అని ఆ ప్రకటనలో పేర్కొన్నారు.