విద్యుత్ సంక్షోభంతో మరోసారి అంధకారంలో వెనెజువెలా

వెనెజువెలాలో మరోసారి విద్యుత్ సంక్షోభం తలెత్తింది. రవాణా వ్యవస్థ స్తంభించిపోయి, దుకాణాలు మూతపడ్డాయి. ప్రజలు తీవ్ర ఇబ్బందులు ఎదుర్కొంటున్నారు.

వెనెజువెలా ప్రజల కష్టాలు ఇప్పట్లో తీరేలా లేవు. విద్యుత్​ సంక్షోభంతో రెండు వారాల క్రితమే మూడు రోజుల పాటు చీకటిమయమైన వెనెజువెలా తాజాగా మరోసారి అంధకారమైంది. రాజధాని కరాకస్​ సహా 16 రాష్ట్రాల్లో విద్యుత్ సరఫరా నిలిచిపోయింది.

కమ్యూనికేషన్ వ్యవస్థ స్తంభించింది. కార్యాలయాలు, దుకాణాలు మూతపడ్డాయి. రవాణా వ్యవస్థకు తీవ్ర అంతరాయం ఏర్పడింది. ప్రజలు కాలి నడకనే ఇళ్లకు చేరుకుంటున్నారు.

" ఆహార పదార్థాలు పాడవుతాయని బాధగా ఉంది. విద్యుత్ సరఫరా లేకుంటే కార్డు రీడర్లు పని చేయవు. అందుకే దుకాణాలు తెరవడం లేదు. ఇది వెనెజువెలాలో ప్రతి పౌరుడి సమస్యగా భావిస్తున్నాం. రాజకీయాలకు తావివ్వకుండా సమస్యను పరిష్కరించాల్సిన అవసరం ఉంది."
-హెర్నాడెజ్, పండ్ల దుకాణం​ యజమాని

అమెరికా ప్రోత్సాహంతో ప్రతిపక్ష మద్దతుదార్లు పవర్​ గ్రిడ్​పై మాగ్నటిక్​ దాడులు చేయటమేక్రితంసారి విద్యుత్ సంక్షోభానికికారణమని అధ్యక్షుడు మదురో ఆరోపించారు. ఈ సారి ఇంకా కారణాలు తెలపలేదు.

" ఇది చాలా విపత్కర పరిస్థితి. దేవుడిపై నమ్మకముంది. విద్యుత్​ సమస్య తాత్కాలికమే అవ్వాలని ఆశిస్తున్నాం. గతంలో మాదిరిగా కొన్ని రోజుల పాటు ఉండకూడదు. అతి త్వరగా పరిస్థితిని చక్కదిద్దుతారని ఆశిస్తున్నాం."
-కార్మెన్​ ఏరియాస్​, సెక్రెటరీ

ప్రస్తుత గందరగోళ పరిస్థితికి ప్రభుత్వ అసమర్థతే కారణమని విద్యుత్​ నిపుణులు, ప్రతిపక్ష నేత జువాన్​ గయిడో ఆరోపిస్తున్నారు.

రాజకీయ అనిశ్చితి, ఆర్థిక సంక్షోభం, విద్యుత్​ సంక్షోభంతో వెనెజువెలా ప్రజలు తీవ్ర ఇబ్బందులు ఎదుర్కొంటున్నారు.