ఆహా: ఉల్లి బీర్, అల్లం బీర్​, చాకొలెట్​ బీర్​...

మీరెప్పుడైనా ఉల్లిపాయ బీర్​ తాగారా? కనీసం జంతికలు లేదా వెన్నతో తయారు చేసినవైనా రుచి చూశారా? మీరు విన్నది నిజమే. పోటీని తట్టుకునేందుకు అమెరికాలో క్రాఫ్ట్​ బీర్​ తయారీదారులు ఈ వింత పోకడలకు పోతున్నారు. వివిధ రుచులను మిళితం చేసి నోరూరించే బీర్లతో మత్తెక్కిస్తున్నారు.

అమెరికాలో క్రాఫ్ట్​ బీర్​కు విపరీతంగా ఆదరణ పెరుగుతోంది. అలానే... తయారీదారుల మధ్య పోటీ కూడా ఎక్కువవుతోంది. 30 బిలియన్​ డాలర్ల క్రాఫ్ట్​ బీర్​ వ్యాపారంలో తమ వాటా పెంచుకునేందుకు అమెరికాలోని 7000 మంది తయారీదారులు ఆలోచనలకు పదను పెడుతున్నారు.

పోటీలో నెగ్గాలంటే ఏదో ఒక ప్రత్యేక అంశం కావాల్సిందే. బీర్​ అభిమానులను ఆకట్టుకునేందుకు వింత వెరైటీలను సృష్టిస్తున్నారు. మూల పదార్థాలలో మార్పులు చేసి కొత్త ఫ్లేవర్లను మార్కెట్​కు పరిచయం చేస్తున్నారు.

"ఇదెంతో బాగుంది. ఎప్పుడైనా మనం కొత్త పదార్థాలతో అమోఘమైన బీర్​ను తయారు చేయొచ్చు. చాలా తమాషా కదా!"
-బెత్​ వాథెన్​, సిటీ బీర్​ స్టోర్​ సహ యజమాని

అల్పాహారం నుంచి ఐస్​క్రీం వరకు అన్ని వెరైటీలనూ తయారు చేస్తున్నారు. చాకొలెట్​, అల్లం, గడ్డి... ఇలా బీర్​ తయారీకి కాదేదీ అనర్హం అన్నట్టుగా సాగుతోంది. 'వైన్​కూప్​' అనే కంపెనీ 'గ్రిల్​ చేసిన గేదె వృషణాల'తో చేసిన బీర్​కు ప్రజల్లో క్రేజ్​ ఎక్కువ.

"ఈ బీర్​ చాలా ప్రాచుర్యం పొందింది. పేరు వినగానే ఒకింత ఆశ్చర్యపోయినా... ఒక్కసారైనా రుచి చూడాల్సిందేనని వస్తున్నారు."
-జాన్​ సిమ్స్​, వైన్​కూప్​ సంస్థ యజమాని

నెవాడా రెనోలో జరిగే 'స్ట్రేంజ్​ బ్ర్యూ' వార్షిక ఉత్సవాల్లో వింత బీర్లు రుచి చూడొచ్చు.

"బీర్​ వీరాభిమానులు తర్వాత ఏంటీ? అనే ఆలోచిస్తారు. అందుకే ఇండియా పేల్​ బీర్లు, క్రాఫ్ట్​ బీర్లకు ఇంత ఆదరణ పెరుగుతోంది."
-జాక్​ కేజ్​, స్ట్రేంజ్​ బ్ర్యూ నిర్వాహకుడు

అమెరికా క్రాఫ్ట్​ బీర్​ పరిశ్రమ వేగంగా విస్తరిస్తోంది. గతేడాది 27.6 బిలియన్​ డాలర్ల బీర్​ అమ్ముడుపోయింది. ప్రస్తుతం 7 శాతం సేల్స్ పెరిగి 30 బిలియన్​ డాలర్లకు చేరుకుంది. ఇది అమెరికా బీర్​ వ్యాపారంలో నాలుగోవంతు.

ఇదీ చూడండి: వంట గదిలోకి వచ్చి వైన్​ తాగిన మొసలి