కరోనా కల్లోలం.. రికార్డు స్థాయిలో నమోదవుతున్న కేసులు

ప్రపంచవ్యాప్తంగా కరోనా మహమ్మారి కరాళ నృత్యం చేస్తోంది. అమెరికాలో కొత్త కేసుల నమోదులో సరికొత్త రికార్డులు నమోదవుతున్నాయి. తొలిసారి అగ్రరాజ్యంలో రికార్డు స్థాయిలో 50వేలకుపైగా కొత్త కేసులు నమోదయ్యాయి. దక్షిణాఫ్రికాలోనూ కరోనా వేగంగా వ్యాపిస్తోంది.

ప్రపంచంపై కరోనా వైరస్​ పంజా విసురుతోంది. కొత్త కేసుల నమోదులో సరికొత్త రికార్డులు నమోదువుతున్నాయి. రోజురోజుకు లక్షకుపైగా కేసులు నమోదు కావటం ఆందోళన కలిగిస్తోంది. మొత్తం కేసుల సంఖ్య కోటి పది లక్షలకు, మరణాలు 5.20 లక్షలకు చేరువయ్యాయి.

అమెరికాలో రికార్డు..

అగ్రరాజ్యంలో కరోనా కోరలు చాస్తోంది. రోజు రోజుకు రికార్డు స్థాయిలో కేసులు నమోదవుతున్నాయి. తొలిసారిగా ఒక్కరోజులో 50,700 కొత్త కేసులు నమోదయ్యాయి. మొత్తం కేసులు 28 లక్షలకు చేరువయ్యాయి. మరణాలు 1.30 లక్షలు దాటాయి. గడిచిన రెండు వారాల్లో కాలిఫోర్నియాలో కేసుల సంఖ్య 50 శాతం మేర పెరిగింది. 24 గంటల్లో 5,900 కేసులు, 110 మరణాలు సంభవించాయి.

దక్షిణాఫ్రికాలోనూ..

దక్షిణాఫ్రికాలోనూ కరోనా వేగంగా విస్తరిస్తోంది. గురువారం ఒక్కరోజే రికార్డు స్థాయిలో 8,124 కొత్త కేసులు నమోదయ్యాయి. ఒక్కరోజు కేసుల్లో ఇదే అత్యధికం. కేసుల సంఖ్య(159,000)తో దక్షిణాఫ్రికా ఆఫ్రికా ఖండంలోనే తొలిస్థానంలో ఉంది.

చైనాలో మళ్లీ విజృంభణ..

వైరస్​ పుట్టినిళ్లు చైనాలో ఈ మహమ్మారి మళ్లీ విజృంభిస్తోంది. గురువారం మరో 3కొత్త కేసులు వచ్చినట్లు జాతీయ ఆరోగ్య కమిషన్​ వెల్లడించింది. అందులో ఒకటి బీజింగ్​లో నమోదైనట్లు తెలిపింది.

దక్షిణ కొరియాలో..

వైరస్​ను కట్టడి చేసినట్లు ప్రకటించిన దక్షిణ కొరియాలో ఈ మహమ్మారి మళ్లీ పంజా విసురుతోంది. గురువారం కొత్తగా 54 కేసులు నమోదైనట్లు అధికారులు వెల్లడించారు. మొత్తం కేసులు 12,904, మరణాలు 282కు చేరాయి.

సింగపూర్​లో..

సింగపూర్​లో ఇవాళ కొత్తగా 188 కేసులు నమోదయ్యాయి. అందులో అత్యధికంగా 178 మంది విదేశీ కార్మికులే ఉన్నారని అధికారులు తెలిపారు. దేశవ్యాప్తంగా మొత్తం కేసుల సంఖ్య 44,310కి చేరింది. మొత్తం 39,011 మంది కోలుకున్నారు. 26 మంది ప్రాణాలు కోల్పోయారు.

పాకిస్థాన్​లో..

పాకిస్థాన్​లో కరోనా మహమ్మారి వేగంగా విస్తరిస్తోంది. ఇవాళ కొత్తగా 4,339 కేసులు నమోదయ్యాయి. 78 మంది ప్రాణాలు కోల్పోయారు. మొత్తం కేసుల సంఖ్య 2,17,809కి, మరణాలు 4,473కి చేరాయి.

నేపాల్​లో..

నేపాల్​లో ఇవాళ 473 మందికి కరోనా పాజిటివ్​గా తేలింది. మొత్తం కేసుల సంఖ్య 14,519కి చేరింది. 31 మంది మరణించారు.

ప్రపంచవ్యాప్తంగా కరోనా కేసుల వివరాలు