అమెరికా-చైనా: సుంకాల తగ్గింపు లేకుండానే ఒప్పందం

అమెరికా-చైనా మధ్య మొదటి దశ వాణిజ్య ఒప్పందం కుదిరింది. ఏడాదికిపైగా రెండు దేశాల మధ్య కొనసాగుతున్న వాణిజ్య యుద్ధానికి ముగింపు పలికే ఈ ఒప్పందంపై అమెరికా అధ్యక్షుడు ట్రంప్​, చైనా ఉపప్రధాని సంతకాలు చేశారు. ఈ చారిత్రక ఒప్పందం నేపథ్యంలో అమెరికా స్టాక్ మార్కెట్లు లాభాల బాట పట్టాయి.

వాణిజ్య యుద్ధానికి ముగింపు పలికేందుకు అమెరికా-చైనా ముందడుగు వేశాయి. ఏడాదికిపైగా జరిపిన ఉన్నతస్థాయి చర్చల అనంతరం రెండు దేశాల మధ్య మొదటి దశ వాణిజ్య ఒప్పందం కుదిరింది.

వాషింగ్టన్​లో జరిగిన కార్యక్రమంలో ఈ ఒప్పందంపై అమెరికా అధ్యక్షుడు డొనాల్డ్ ట్రంప్​, చైనా ఉప ప్రధాని లియూ హి సంతకాలు చేశారు. అయితే చైనా ఎగుమతులపై సుంకాల తగ్గింపును ఒప్పందంలో చేర్చలేదు.

ఒప్పందంలోని అంశాలు..

మేధో హక్కుల పరిరక్షణ, బలవంతపు సాంకేతిక బదిలీకి ముగింపు, వివాదాల పరిష్కారాలకు సమర్థమైన వ్యవస్థ ఏర్పాటు, కరెన్సీ మార్పులకు ముగింపు తదితర అంశాలు ఈ ఒప్పందంలో ఉన్నాయి. ఈ ఒప్పందం ద్వారా చైనాకు అమెరికా రైతుల పంటలు, పారిశ్రామిక ఉత్పత్తుల ఎగుమతులు పెరుగనున్నాయి.

చారిత్రక ఒప్పందం: ట్రంప్​

ఈ మొదటి దశ ఒప్పందం చారిత్రాకమైనదని ట్రంప్​ అభివర్ణించారు. భవిష్యత్తులో రెండు దేశాలమధ్య న్యాయమైన పరస్పర వాణిజ్యానికి బాటలు వేస్తుందని అభిప్రాయపడ్డారు. సుంకాల తగ్గింపుపై రెండో దశ ఒప్పందంలో పరిశీలిస్తామని తెలిపారు.

స్టాక్​ మార్కెట్ల పరుగులు

అమెరికా-చైనా మొదటి దశ వాణిజ్య ఒప్పందంతో అగ్రరాజ్య స్టాక్​ మార్కెట్లు పరుగులు పెట్టాయి. ఎన్నో రోజులుగా ఎదురుచూస్తున్న కీలక ఒప్పందం కుదిరిన నేపథ్యంలో డౌ జోన్స్ 0.3 శాతం లాభపడింది. ఎస్​ అండ్​ పీ 500 కూడా 0.2 శాతం లాభాలు అర్జించింది.

ఇదీ చూడండి: చైనాపై 'కరెన్సీ మ్యానిపులేటర్' ముద్ర తొలగించిన అమెరికా