మధ్యప్రాచ్యంలో ఉద్రిక్తత: సౌదీ ట్యాంకర్లు ధ్వంసం

సౌదీ అరేబియాకు చెందిన రెండు ఆయిల్​ ట్యాంకర్లు ధ్వంసమైనట్టు సోమవారం ఆ దేశం ప్రకటించింది. అమెరికా- ఇరాన్​ మధ్య ప్రతిష్టంభన నెలకొన్న తరుణంలో ఈ ఘటన జరగడంపై సౌదీ ఆగ్రహం వ్యక్తం చేసింది. ఇరాన్​తో అగ్రరాజ్యం ప్రవర్తిస్తోన్న తీరును పలు దేశాలు తప్పుపట్టాయి. సంయమనం పాటించాలని సూచించాయి.

గల్ఫ్​ ప్రాంతంలో తమ దేశానికి సంబంధించిన రెండు చమురు రవాణా నౌక (ఆయిల్​ ట్యాంకర్లు)లపై అనూహ్య రీతిలో దాడి జరిగిందని సౌదీ అరేబియా సోమవారం ప్రకటించింది. దాడిలోట్యాంకర్లు స్వల్పంగా ధ్వంసమయ్యాయని వెల్లడించింది. అమెరికా- ఇరాన్​ దేశాల మధ్య యుద్ధ మేఘాలు అలుముకున్న తరుణంలో ఈ దాడులు జరగడంపై తీవ్ర ఆవేదన వ్యక్తం చేసింది సౌదీ. నౌకలపై దాడిని ఖండిస్తూ... ఘటనపై దర్యాప్తునకు ఆదేశించింది.

మాటల యుద్ధం...

తమ దేశ ప్రయోజనాలకు విరుద్ధంగా​ ప్రవర్తిస్తోందని ఇరాన్​పై మండిపడిందిఅమెరికా. ఇప్పటికే మధ్యప్రాచ్యంలోకి యుద్ధనౌకలను తరలించింది అగ్రరాజ్యం. 2018లో అణు ఒప్పందం నుంచి ట్రంప్​ ప్రభుత్వం వైదొలగడం, ఇటీవలి కాలంలో ముడిచమురుపై అగ్రరాజ్యం తన ఆధిపత్యధోరణి ప్రదర్శిస్తోందని ఇరాన్​ ఆగ్రహం వ్యక్తం చేస్తోంది.

అగ్రరాజ్యం తీరుపై ఆవేదన...

అమెరికా- ఇరాన్​ దేశాల మధ్య నెలకొన్న ఉద్రిక్త వాతావరణంపై పలు దేశాలు ఆవేదన వ్యక్తం చేశాయి. అగ్రరాజ్యం తీరును బ్రిటన్​, ఫ్రాన్స్​, జర్మనీ దేశాలు తప్పుపట్టాయి. అమెరికా విదేశాంగ మంత్రితో బ్రసెల్స్​లో జరిగిన సమావేశంలో ఈ విషయాన్ని స్పష్టం చేశాయి. పరిస్థితిని మరింత తీవ్రం చేయొద్దని అగ్రరాజ్యాన్ని అభ్యర్థించింది ఐరోపా.

ఉద్రిక్త పరిస్థితులు అవాంఛనీయ ఘటనలకు దారి తీసే అవకాశముందని అమెరికాను హెచ్చరించింది బ్రిటన్​. ఈ విషయంలో సంయమనం పాటించాలని సూచించింది.

ఇదీ చూడండి: ఒళ్లు గగుర్పొడిచేలా 'హై లైన్'​ విన్యాసాలు