ప్రపంచవ్యాప్తంగా కొవిడ్ కేసుల(covid cases) సంఖ్య స్థిరంగా కొనసాగుతున్నట్లు కనిపిస్తోందని ప్రపంచ ఆరోగ్య సంస్థ(World health organisation) తెలిపింది. గత రెండు నెలలుగా వారానికి దాదాపుగా 45 లక్షల కేసులు నమోదవుతున్నట్లు వెల్లడించింది. పశ్చిమ పసిఫిక్ ప్రాంతంలో 20 శాతం, అమెరికాల్లో 8 శాతం కేసుల్లో పెరుగుదల ఉన్నట్లు తెలిపింది. మిగతా ప్రాంతాల్లో కేసులు ఒకే రీతిలో కొనసాగడం లేదా తగ్గుతుండటం కనిపిస్తోందని పేర్కొంది.
అమెరికా, ఇరాన్, భారత్(covid cases in india), బ్రిటన్, బ్రెజిల్ దేశాల్లో అధికశాతం కొవిడ్ కేసులు నమోదవుతున్నట్లు డబ్ల్యూహెచ్ఓ నివేదికలో పేర్కొంది. గతవారంలో.. ప్రపంచవ్యాప్తంగా 68,000 మంది కొవిడ్ కారణంగా మరణించారని తెలిపింది. యూరప్, అమెరికాలో మరణాల రేటు 10 శాతం పెరిగిందని వెల్లడించింది.
ఎమర్జెన్సీ పొడిగింపు..
జపాన్లో డెల్టా వేరియంట్(Delta variant) పంజా విసురుతోంది. ఈ నేపథ్యంలో వైరస్ కట్టడి చర్యల్లో భాగంగా.. ఆ దేశ ప్రభుత్వం ఎమర్జెన్సీ నిబంధనలను పొడిగిస్తున్నట్లు ప్రకటించింది. మరో ఎనిమిది ప్రాంతాల్లో ఎమర్జెన్సీ అమలు చేయనున్నట్లు ప్రకటించింది. హొక్కైడో, మియాగి, ఐచ్చి, గిఫు, హిరోషియా, ఒకాయామ ప్రాంతాలు ఎమర్జెన్సీ జాబితాలో చేరినట్లు తెలిపింది.