'అభిశంసన ప్రక్రియ ఆపండి'... స్పీకర్​కు ట్రంప్​ లేఖ

అభిశంసన అభియోగాలపై అమెరికా ప్రతినిధుల సభ బుధవారం ఓటింగ్​ జరపనున్న నేపథ్యంలో స్పీకర్​ నాన్సీ పెలోసీకి లేఖ రాశారు అధ్యక్షుడు డొనాల్డ్​ ట్రంప్. అభిశంసన ప్రక్రియను నిలిపివేయాలని కోరారు. రాజ్యాంగ విరుద్ధంగా అధికారాన్ని దుర్వినియోగం చేస్తున్నారని ఆరోపించారు. తాను ఎలాంటి నేరాలకు పాల్పడలేదని.. 2020 అధ్యక్ష ఎన్నికల్లో డెమొక్రాట్లకు ప్రజలే సరైన బుద్ధి చెబుతారని హెచ్చరించారు.

అమెరికా ప్రతినిధుల సభలో బుధవారం అభిశంసనపై ఓటింగ్​ చేపట్టనున్నట్లు స్పీకర్​ నాన్సీ పెలోసీ ప్రకటించడాన్ని తప్పుపట్టారు అధ్యక్షుడు డొనాల్డ్​ ట్రంప్​. అభిశంసన ప్రక్రియను ఆపాలని కోరుతూ.. పెలోసీకి లేఖ రాశారు. తనపై అభిశంసనతో డెమొక్రాట్లు .. హక్కుల దుర్వినియోగానికి పాల్పడ్డారని విమర్శించారు ట్రంప్​.

"డెమొక్రాట్​ చట్టసభ్యులు రాజ్యాంగ విరుద్ధంగా అధికారాన్ని దుర్వినియోగం చేసి అభిశంసన ప్రక్రియ చేపట్టారు. రెండున్నర శతాబ్దాల అమెరిక​ శాసన చరిత్రలో ఇలా ఎన్నడూ జరగలేదు. మీరు అభిశంసన ప్రాధానాన్ని తగ్గిస్తున్నారు. అభిశంసన చర్యతో ముందుకు వెళితే మీ అధికారాన్ని దుర్వినియోగం చేసినట్లే. రాజ్యాంగంపై మీ విధేయతను ఉల్లంఘిస్తున్నారు. అమెరికా​ ప్రజాస్వామ్యంపై బహిరంగ యుద్ధాన్ని ప్రకటిస్తున్నారు."

- స్పీకర్​కు లేఖలో ట్రంప్​

ప్రజలే సరైన గుణపాఠం చెబుతారు..

తాను ఎటువంటి నేరాలు, దుశ్చర్యలకు పాల్పడలేదని లేఖలో పేర్కొన్నారు ట్రంప్​. అభిశంసన చర్యతో ముందుకు వెళ్తే డెమొక్రాట్లు క్షమించరాని తప్పు చేసినట్లేనని తెలిపారు. తాను పదవీ విరమణ చేసిన తర్వాతే నూతన అధ్యక్షుడు వస్తారని స్పష్టం చేశారు. 2020లో జరిగే ఎన్నికల్లో డెమొక్రాట్లకు ప్రజలు సరైన గుణపాఠం చెప్తారని హెచ్చరించారు.

ఇదీ చూడండి: ట్రంప్ అభిశంసనలో కీలక మలుపు.. బుధవారమే ఓటింగ్