చిలీ సైనిక విమాన శకలాల గుర్తింపు!

చిలీ వైమానిక దళానికి చెందిన సీ-130 విమానం 38 మందితో పుంటా ఏరినాస్​ నగరం నుంచి బయలుదేరి గత సోమవారం అదృశ్యమైంది. విహంగం కోసం తనిఖీలు ముమ్మరం చేసిన అధికారులు బుధవారం శకలాలను గుర్తించారు. వీటిపై పరిశోధన జరిపిన అనంతరం.. అధికారికంగా ప్రకటించనున్నట్లు తెలిపారు.

38 మందితో వెళ్తూ 2 రోజుల క్రితం అదృశ్యమైన చిలీ వైమానిక దళ సైనిక విమానం శకలాలను గుర్తించారు అధికారులు. సీ-130 హెర్య్కూలస్​ విమానం కోసం సుమారు 70వేల చదరపు కిలోమీటర్ల పరిధిలో తనిఖీలు చేపట్టాయి బలగాలు. విహంగంతో సంబంధాలు తెగిపోయిన ప్రాంతానికి సుమారు 30 కిలోమీటర్ల దూరంలో.. విమానానికి చెందిన 'స్పాంజ్​' పదార్థాన్ని గుర్తించినట్లు వైమానిక దళ జనరల్​ ఎడ్వర్డో మోస్క్వైరా తెలిపారు. శకలాలపై పరిశోధన చేసి ఏ విమానానికి చెందినవో తేల్చాల్సి ఉందన్నారు.

గత సోమవారం.. చిలీలోని పుంటా ఏరినాస్​ నగరం నుంచి వైమానిక విమానం సీ-130 బయలుదేరి అంటార్కిటికా వెళ్లాల్సి ఉంది. డ్రేక్​ పాస్​ సముద్ర ప్రాంతం మీదుగా వెళుతున్న క్రమంలో కంట్రోల్​ విభాగంతో సంబంధాలు తెగిపోయాయి.

38 మందికి చెందిన కుటుంబీకులు, బంధువులు.. దక్షిణ చిలీ నగరం పుంటా ఏరినాస్​కు చేరుకున్నారు. విమానం బయలుదేరిన సమయంలో అందులో 17 మంది సిబ్బంది, 21 మంది ప్రయాణికులు ఉన్నారు.

ఇదీ చూడండి: రూ.85 లక్షలు విలువైన అరటి పండును తినేశాడు!