సమాధులకు పూజలు.. ఆత్మలతో ముచ్చట్లు..!

సహజంగా మనం శ్మశానాలవైపు కన్నెత్తి కూడా చూడం. అటువైపు వెళ్లాలన్నా ఏదో తెలియని భయం. తప్పని పరిస్థితుల్లో వెళ్లాల్సి వస్తే.. ఇక దేవునిపై భారం వేయాల్సిందే. కానీ.. హైతీ దేశస్థులు ఏడాదిలో రెండు రోజులు శ్మశానాలకు తరలివెళ్తారు. సమాధులకు ప్రత్యేక పూజలు చేస్తారు. వాటి ముందు మైమరచిపోయి నృత్యాలు చేస్తారు. ఎందుకు?

లక్షలాది మంది ప్రజలతో కరీబియన్​ దేశం హైతీలోని శ్మశానాలు కిక్కిరిశాయి. 'ఫెస్టివల్​ ఆఫ్​ డెడ్' ఉత్సవాల్లో ఆ దేశ ప్రజలు ఎంతో ఉత్సాహంగా పాల్గొన్నారు. 2 రోజుల పాటు జరిగే ఆ వేడుకలు సాధారణంగా ప్రతి ఏటా నవంబర్​ మొదటి వారంలో జరుగుతాయి. మంచి భవిష్యత్తు, ఉద్యోగం, ఆరోగ్యం కోసం సమాధులను ప్రార్థిస్తారు హైతీవాసులు.

అనేక మంది.. సమాధులపై మద్యం పోసి కొవ్వొత్తులు వెలిగించి సమాధులకు ప్రత్యేక పూజలు చేశారు. దీనిని 'ఊడూ' సంప్రదాయమంటారు. కొందరు భక్తితో మైమరిచిపోయి నృత్యాలు చేశారు. మరికొందరు సమాధుల ముందు నిశ్శబ్దంగా నిల్చొని.. తమకు సహాయం చేయాలని ఆత్మలను వేడుకున్నారు.

క్రైస్తవ సిద్ధాంతాలు, బానిసలతో కూడిన ఆఫ్రికన్​ మతాల కలయిక ఈ ఊడూ. ఈ సంప్రదాయాన్ని హైతీలోని దాదాపు 90 లక్షలమంది పాటిస్తారు. ఇది క్షుద్ర పూజలకు సమానమని.. అనేక మంది ఊడూను కొన్నేళ్ల పాటు తీవ్రంగా వ్యతిరేకించారు. కానీ ఊడూకు పెరుగుతున్న ఆదరణ వల్ల 2003లో అక్కడి ప్రభుత్వం ఈ సంప్రదాయం ఒక మతంతో సమానం అని ప్రకటించింది. క్రైస్తవ మత స్వీకరణ(బాప్తిజం), వివాహాలు చేయించడానికి అక్కడి పూజారులకు అనుమతినిచ్చింది.

ఇదీ చూడండి:-సిగరెట్లు ఎక్కువగా కాలుస్తున్నారా? ఇది మీకోసమే..