కరోనా వైరస్పై పోరులో భాగంగా వ్యాక్సిన్ తయారీకి తీవ్రంగా శ్రమిస్తున్నారు ఆక్స్ఫర్డ్ విశ్వవిద్యాలయ శాస్త్రవేత్తలు. ఇప్పటికే వాలంటీర్లపై వ్యాక్సిన్ను పరీక్షిస్తున్నారు. అయితే ఈ ట్రయల్స్కు సంబంధించిన ఫలితాలు వెలువడిన అనంతరం వ్యాక్సిన్ పరీక్షలను విస్తరించే అవకాశముందని శాస్త్రవేత్తలు ఆశాభావం వ్యక్తం చేశారు.
"ఆక్స్ఫర్డ్ యూనివర్సిటీ ఈ నెల 23న వ్యాక్సిన్ ట్రయల్స్ ప్రారంభించింది. వచ్చే నెలలో 800మంది వాలంటీర్లపై ఈ వ్యాక్సిన్ను పరీక్షించేందుకు ప్రణాళికలు రచిస్తోంది. యూకేలో ట్రయల్స్ విజయవంతమైతే.. కెన్యా వైద్య పరిశోధనా సంస్థలోని శాస్త్రవేత్తలను సంప్రదిస్తాం. కెన్యాలో పరీక్షలు నిర్వహించేందుకు అక్కడి ప్రభుత్వాన్ని అనుమతులు కోరతాం."
-- ఆక్స్ఫర్డ్ వ్యాక్సిన్ బృందం.
అయితే మే చివరి నాటికి సుమారు 6వేల మందిపై వ్యాక్సిన్ ట్రయల్స్ నిర్వహించాలని శాస్త్రవేత్తలు యోచిస్తున్నట్టు న్యూయార్క్ టైమ్స్ ఓ నివేదికలో పేర్కొంది. ఒకవేళ ఈ ట్రయల్స్ సత్ఫలితాలనిస్తే.. సెప్టెంబర్ నాటికి మిలియన్ డోసులు అందుబాటులోకి వచ్చే అవకాశముందని వెల్లడించింది.
అమెరికాలోని నేషనల్ ఇన్స్టిట్యూట్ ఆఫ్ హెల్త్కు చెందిన రాకీ మోంటైన్ ల్యాబొరేటరీలో ఈ పరిశోధనలు జరుగుతున్నాయి. వైరస్పై పోరులో భాగంగా రిసాస్ మకాక్ అనే కోతి జాతికి ఈ వ్యాక్సిన్ను అందించారు. మంచి ఫలితాలు వచ్చాయి. అప్పుడే మానవులపైనా ఈ వ్యాక్సిన్ పనిచేస్తుందన్న ఆశ కలిగింది. అయితే ఇది కేవలం ట్రయల్స్ దశలో ఉన్నందున ఇప్పుడప్పుడే ఏ విషయం చెప్పలేమని శాస్త్రవేత్తలు స్పష్టం చేశారు.
