'చైనా ఉత్పత్తులపై సుంకాల తగ్గింపు ప్రసక్తే లేదు'

చైనాతో వాణిజ్య ఒప్పందం కుదుర్చుకోవడానికి తమకు తొందరేమీ లేదని అమెరికా అధ్యక్షుడు డొనాల్డ్ ట్రంప్​ స్పష్టం చేశారు. ఒప్పందం కోసం చైనా తమకంటే ఎక్కువగా పరితపిస్తోందని అన్నారు. ఇరు దేశాల మధ్య జరిగే తొలి దఫా చర్చల్లో సుంకాల తగ్గింపు ఉంటుందని చైనా చేసిన వ్యాఖ్యలనూ తోసిపుచ్చారు ట్రంప్.

అమెరికా, చైనాల మధ్య వాణిజ్య యుద్ధానికి ఇప్పట్లో తెరపడేలా కనిపించడం లేదు. ఇరుదేశాలు విధించుకున్న సుంకాలు తొలగింపుపై ఇప్పటికే రెండు దేశాలు ప్రకటించగా.. అధ్యక్షుడు డొనాల్డ్ ట్రంప్​ తాజా వ్యాఖ్యలతో వాటిపైనా నీలినీడలు కమ్ముకున్నాయి. చైనాతో వాణిజ్య ఒప్పందం కుదుర్చుకోవడానికి అంత తొందరేమీ లేదని స్పష్టం చేశారు ట్రంప్. సుంకాల తగ్గింపును చైనా కోరుకుంటోందని.. కానీ అది జరగబోదని అన్నారు.

అమెరికా, చైనాల మధ్య జరిగే తొలి దఫా వాణిజ్య ఒప్పందంలో సుంకాల తగ్గింపు ఉంటుందని చైనా వాణిజ్య శాఖ చేసిన ప్రకటననూ ట్రంప్ తోసిపుచ్చారు. వాణిజ్య ఒప్పందం చేసుకోవడానికి అమెరికా కంటే ఎక్కువగా చైనా పరితపిస్తోందని వ్యాఖ్యానించారు.

'సుంకాలపై వెనక్కి తగ్గాలని చైనా కోరుకుంటోంది. కానీ అది నేను చేయనని వారికి తెలుసు. అమెరికాతో ఒప్పందం చేసుకోవడానికి చైనా ప్రయత్నిస్తోంది. నిజానికి ఒప్పందం జరగాలని వారు నాకంటే ఎక్కువగా కోరుకుంటున్నారు. ఇప్పుడు నేను చాలా సంతోషంగా ఉన్నాను.'
-డొనాల్డ్ ట్రంప్​, అమెరికా అధ్యక్షుడు.

అమెరికా, చైనాల మధ్య వాణిజ్య యుద్ధం గతేడాది మార్చిలో ప్రారంభమైంది. వందల బిలియన్ డాలర్ల ఉత్పత్తులపై ఇరుదేశాలు సుంకాలు విధించుకున్నాయి. రెండు దేశాల మధ్య వాణిజ్య ఒప్పందం కోసం గత నవంబర్​లో చర్చలు ప్రారంభమయ్యాయి. అయితే ఇప్పటివరకు వీటి ద్వారా ఎలాంటి సానుకూల ఫలితాలు రాలేదు.