అంగారకుడిపై ఒకప్పుడు జీవంజాలం ఉందా? లేదా? అని పరిశోధన చేసేందుకు అమెరికా పంపిన వ్యోమనౌక 'పర్సెవరెన్స్' ఆ గ్రహంపై కాలుమోపిన అద్భుత వీడియోను నాసా తాజాగా విడుదల చేసింది. మూడు నిమిషాలకుపైగా నిడివిగల ఈ వీడియోలో 'పర్సెవరెన్స్' అరుణగ్రహ ఉపరితలంపై ల్యాండ్ అయిన క్షణాలు రికార్డు అయ్యాయి. వీడియోను చూస్తూ నాసా శాస్త్రవేత్తలు ఆనందంలో మునిగిపోయారు. ఈ వీడియో, చిత్రాలు తమ కలల రూపంగా పేర్కొన్నారు.
వ్యోమనౌక ల్యాండవుతున్న సమయంలో అంగారకుడిపై దుమ్ము లేచిపోవడం, తాళ్ల సాయంతో రోవర్‌ కిందకి దిగడం, శాస్త్రవేత్తలు చప్పట్లతో హర్షించడం వీడియోలో స్పష్టంగా కనిపిస్తోంది. పర్సెవరెన్స్ రోవర్‌ శుక్రవారం అరుణ గ్రహ ఉపరితలంపై దిగింది. ఆ వ్యోమనౌకలో రికార్డు స్థాయిలో 25 కెమెరాలు, రెండు మైక్రోఫోన్లును ఇంజినీర్లు అమర్చారు. వీటిలో 7 కెమెరాలను ల్యాండింగ్‌ సమయంలోనే రికార్డు చేయడానికి ఇంజినీర్లు స్విచ్‌ ఆన్‌ చేశారు. రానున్న కొద్ది రోజుల్లో రోవర్‌ ల్యాండింగ్‌కు సంబంధించి మరిన్ని ఫొటోలు, వీడియో రికార్డింగ్‌లను వెలువరిస్తామని చెప్పిన మూడు రోజులకే నాసా తాజాగా ఈ వీడియో విడుదల చేసింది. ఇప్పటికే పర్సెవరెన్స్ అరుణ గ్రహ ఉపరితలానికి సంబంధించిన అద్భుతమైన ఫొటోలు పంపించింది.
ఇదీ చూడండి:మార్స్పై క్రికెట్ గ్రౌండ్!.. ఐసీసీ ఆసక్తికర పోస్ట్
