'కాపాడు తల్లీ'... అగ్నిపర్వతానికి ప్రత్యేక పూజలు మెక్సికో శాంటియాగో ప్రాంతంలోని ఇజ్టెక్సిహుత్ అగ్నిపర్వతానికి ప్రత్యేక పూజలు చేశారు షాలిట్జింట్లా వాసులు. ప్రజలను రక్షించాలని, సమృద్ధిగా వర్షాలు కురిపించి, పంటలు పండించాలని వేడుకున్నారు. వందల మంది గ్రామవాసులు పర్వతానికి చేరుకుని తమకు తోచిన విధంగా పూలు, పళ్లు, పలహారాలు సమర్పించారు. ఇజ్టెక్సిహుత్ సమీపంలోని ఇతర అగ్నిపర్వతాలు శాంతంగా ఉండేలా చూడాలని ప్రార్థించారు.
ప్రస్తుతం పోపోకాటేపెట్ల్ అనే అగ్నిపర్వతం నిప్పులు చెరుగుతోంది. పరిసర ప్రాంత ప్రజలను ఖాళీ చేయాలని అధికారులు హెచ్చరికలు జారీ చేశారు. చేసేది లేక ఇజ్టెక్సిహుత్ అగ్నిపర్వతాన్ని వేడుకునేందుకు కొండపైకి వందల మంది ప్రజలు చేరుకున్నారు.
" మాకు అన్నీ ఇచ్చినందుకు ఇజ్టెక్సిహుత్ పర్వత మాతకు మేము కృతజ్ఞతలు చెబుతున్నాం. మా పంటల కోసం వర్షాలు కురిపించాలని ఆమెను అడుగుతున్నాం. ఇక్కడ జీవించేందుకు వీలు కల్పించినందుకు, సంతోషంగా ఉండేందుకు చోటు ఇచ్చినందుకు అగ్నిపర్వతాలకు మేము కృతజ్ఞులం. "
- నసారియో, శాంటియాగో షాలిట్జింట్లా వాసి.
ఈ వేడుకలు ఏటా మే ప్రారంభంలో రెండు రోజుల పాటు నిర్వహిస్తారు. తమ వెంట తీసుకొచ్చిన పుష్పాలు, వివిధ రకాల వంటకాలను సమర్పించిన అనంతరం ఆటపాటలతో ఉత్సాహంగా గడుపుతారు.
ఇదీ చూడండి:ఒడిశాలో 'ఫొని' మృతుల సంఖ్య 34కి చేరిక
