నడిరోడ్డుపై పట్టపగలు గన్​ఫైట్​... 14 మంది మృతి

మెక్సికో విల్లా యూనియన్​ పట్టణంలో ప్రభుత్వ భవనాలే లక్ష్యంగా దుండగులు దాడులకు తెగబడ్డారు. ఈ క్రమంలో పోలీసులు, దుండగుల మధ్య సుమారు గంటపాటు భీకర పోరు జరిగింది. తుపాకీల మోతతో నగరం దద్ధరిల్లింది. ఈ దుర్ఘటనలో నలుగురు రక్షణ సిబ్బంది సహా.. మొత్తం 14 మంది ప్రాణాలు కోల్పోయారు. మరికొంత మంది ఆచూకీ గల్లంతైంది.

తుపాకీల మోతతో మెక్సికో కోహూయిలా రాష్ట్రంలోని విల్లా యూనియన్​ పట్టణం దద్దరిల్లింది. ట్రక్కుల్లో వచ్చిన దుండగులు.. ప్రభుత్వ కార్యాలయాలే లక్ష్యంగా దాడులకు తెగబడ్డారు. వారిని నిలువరించే క్రమంలో భద్రతా సిబ్బంది, దుండగుల మధ్య సుమారు గంటపాటు భీకర పోరు జరిగింది. ఈ ఘటనలో మొత్తం 14 మంది ప్రాణాలు కోల్పోయారు. వీరిలో నలుగురు భద్రతా సిబ్బంది. స్థానిక పురపాలక సంస్థలో పనిచేసే కొంత మంది కార్మికుల ఆచూకీ గల్లంతైనట్లు అధికారులు తెలిపారు.

దాడి చేసింది ఈశాన్య ప్రాంతానికి చెందిన మాదకద్రవ్యాల ముఠా అని అనుమానిస్తున్నారు పోలీసులు.

మెక్సికో అధ్యక్షుడిగా ఆండ్రెస్​ మాన్యువల్​ లోపేజ్​ ఒబ్రాడోర్​ బాధ్యతలు చేపట్టిన 10 నెలల్లో దేశంలో హత్యల రేటు సుమారు 2 శాతం పెరిగింది. 2019లో ఇప్పటి వరకు మొత్తం 29,414 మంది హత్యకు గురైనట్లు అధికారులు తెలిపారు. అది 2018లో.. 28,869గా ఉంది.

కొద్ది రోజుల క్రితం అమెరికాకు చెందిన ముగ్గురు మహిళలు, ఆరుగురు చిన్నారులను మాదకద్రవ్యాల ముఠా హత్య చేసిన ఉదంతం ప్రపంచం దృష్టిని ఆకర్షించింది.

ఇదీ చూడండి: నడిరోడ్డుపై 'భూతాల' పరుగులు- జనం నవ్వులు