అమెరికాలో జాత్యహంకార నేరానికి పాల్పడిన తెల్లజాతీయుడు జేమ్స్ అలెక్స్ ఫీల్డ్స్(22)కు.. 419 సంవత్సరాల జైలు శిక్ష విధించింది వర్జీనియా చార్లెట్స్విల్లే సర్క్యూట్ న్యాయస్థానం. 2017 ఆగస్టు 12న చార్లెట్స్విల్లే నగరంలో జరిగిన 'యునైట్ ద రైట్' ర్యాలీ సందర్భంగా నిరసనకారులపైకి కారుతో వేగంగా దూసుకొచ్చాడు ఫీల్డ్స్. ఘటనలో ఒక వ్యక్తి మరణించగా, డజన్ల మంది గాయపడ్డారు.
గత నెల్లోనే 29 కేసుల్లో కోర్టు ఫీల్డ్స్కు జీవిత ఖైదు విధించింది.
స్టేట్ జ్యూరీ సిఫార్సు మేరకు న్యాయమూర్తి రిచర్డ్ మూర్ జేమ్స్కు తాజాగా 419ఏళ్ల జైలు శిక్ష విధించారు.
ఏం జరిగింది?
అమెరికా వర్జీనియా రాష్ట్రంలోని చార్లెట్స్విల్లే నగరంలో కాన్ఫెడెరేట్ జనరల్ రాబర్ట్ ఈ లీ విగ్రహం తొలగింపునకు నిరసనగా తెల్ల జాతీయులు ర్యాలీ చేపట్టారు. ఫీల్డ్స్ కూడా ఒహాయోలోని మయామీ నుంచి వచ్చి ఈ ర్యాలీలో పాల్గొన్నాడు.
ఈ ర్యాలీకి వ్యతిరేకంగా మరికొంత మంది నిరసనలు వ్యక్తం చేశారు. ఇరువర్గాల మధ్య ఘర్షణలు జరిగాయి. తరువాత ఫీల్డ్స్ తన కారుతో వ్యతిరేక నిరసనకారులపైకి దూసుకెళ్లాడు. ఈ ఘటనలో హెదర్ హెయర్ (32) మరణించగా, 24 మందికి పైగా గాయపడ్డారు.
ఈ సంఘటనతో అమెరికాలో జాతివైరం పెరిగిపోయి ఉద్రిక్తతలకు దారితీసింది. ఈ ఘటనపై ట్రంప్ చేసిన వ్యాఖ్యలు పెనుదుమారమే రేపాయి.
ఇదీ చూడండి:వాషింగ్టన్లో కారులే పడవలయ్యాయి..!
