నాసా హెలికాఫ్టర్​కు 'రూపానీ' సూచించిన పేరు

అమెరికాలో భారత సంతతి విద్యార్థినికి అరుదైన గౌరవం లభించింది. అంగారక గ్రహంపై ఉపయోగించే తొలి హెలికాఫ్టర్​కు వనీజా రూపానీ సూచించిన పేరు పెట్టాలని నాసా నిర్ణయించింది. నాసా నిర్వహించిన నేమ్​ ద రోవర్​ పోటీల్లో ఈ అమ్మాయి రాసిన వ్యాసం ఎంపికైనందున ఈమె పేరును అధికారికంగా ఖరారు చేసింది.

అమెరికాలోని నార్త్​పోర్ట్​కు చెందిన 17 ఏళ్ల భారత సంతతి బాలిక.. వనీజా రూపానీ అరుదైన గౌరవం దక్కించుకుంది. అంగారక గ్రహంపై ఉపయోగించే తమ తొలి హెలికాఫ్టర్​కు వనీజా సూచించిన 'ఇన్జెన్యునిటీ' పేరు పెట్టాలని నాసా నిర్ణయించింది. నాసా నిర్వహించిన 'నేమ్ ద రోవర్' పోటీలో ఈ అమ్మాయి సమర్పించిన వ్యాసం ఎంపికయినందున.. ఈమె పేరును అధికారికంగా ఖరారు చేసింది.

'ఇన్జెన్యునిటీ' హెలికాఫ్టర్​

అంగారకుడిపైకి పంపించే తదుపరి రోవర్​కు 'పెర్జెవరాన్స్​' అనే పేరు పెట్టింది. మార్చిలో నిర్వహించిన వ్యాసరచన పోటీలో విజయం సాధించిన ఏడో తరగతి బాలుడు అలెగ్జాండర్​ మాథర్స్​ సూచన మేరకు.. ఆ పేరును ఖరారు చేసింది. హెలికాఫ్టర్​కు 'ఇన్జెన్యునిటీ' పేరు పెట్టింది. ఇన్జెన్యునిటీ మరో ప్రపంచంలో ఎగరనున్న శక్తిమంతమైన హెలికాఫ్టర్​గా నాసా ట్విట్టర్​లో పేర్కొంది. రోవర్​తో సహా.. ఈ హెలికాఫ్టర్​ను జులైలో అంగారక గ్రహంపైకి పంపనున్నారు. వచ్చే ఏడాది ఫిబ్రవరిలో ఇవి మార్స్​ను చేరతాయి.

28 వేల వ్యాసాల నుంచి

అమెరికా వ్యాప్తంగా 12వ తరగతి విద్యార్థులు సమర్పించిన 28 వేల వ్యాసాల నుంచి.. రూపానీ సూచించిన పేరు ఎంపికైంది. 'ఇన్జెన్యునిటీ', మానవ మేథస్సు కలిసి గ్రహాంతర ప్రయాణ సవాళ్లను అధిగమిస్తుందని రూపానీ ఈ వ్యాసంలో రాసుకొచ్చింది. అంతరిక్ష అద్భుతాల అన్వేషణలో మనకు అవకాశాలను కల్పిస్తుందని ఈ బాలిక పేర్కొంది. అయితే, తన వ్యాసాలను ఎంపిక చేయడం పట్ల.. వనజా ఆనందం వ్యక్తం చేసింది.

ఇదీ చదవండి:మోదీ ఖాతా​ను 'వైట్​హౌస్​' ఎందుకు అన్​ఫాలో అయిందంటే.?