అమెరికా అధ్యక్ష ఎన్నికలు సమీపిస్తున్నాయి. ఓటర్లను ఆకట్టుకోవటానికి అభ్యర్థులు విస్తృత ప్రయత్నాలు చేస్తున్నారు. ఈ నేపథ్యంలో అగ్రరాజ్యంలో భారీ సంఖ్యలో ఉన్న భారతీయుల మద్దతు ఎవరికనే అంశం.. ఆసక్తికరంగా మారింది. ఫలితాలను ప్రభావితం చేయగలస్థాయిలో ఉన్న ఇండో-అమెరికన్ల మద్దతు బైడెన్కే అంటున్నాయి సర్వేలు. అయితే, గుజరాతీలు మాత్రం ట్రంప్ వెంటే ఉన్నారంటున్నాయి.
అగ్రరాజ్యం అమెరికా అధ్యక్ష ఎన్నికలపై ప్రపంచం మొత్తం దృష్టిసారించింది. ఇరువురు నేతలు.. గెలుపే లక్ష్యంగా తలపడుతున్నారు. ఈ నేపథ్యంలో కీలకమైన ప్రవాస భారతీయుల ఓట్లు డెమొక్రాట్ల అభ్యర్థి బైడెన్వైపే ఉన్నాయంటోంది ఇండియాస్పోరా నివేదిక.
బైడెన్ వైపే మొగ్గు
ప్రస్తుతం డొనాల్డ్ ట్రంప్ మద్దతుదారుల సంఖ్యలో గణనీయమైన పెరుగుదల కనిపిస్తున్నా... అమెరికాలోని ప్రవాస భారతీయులు భారీగా డెమొక్రాట్ల అభ్యర్థి జో బైడెన్ వైపే మొగ్గు చూపుతున్నారని విశ్లేషకులు చెబుతున్నారు. అయితే, నమస్తే ట్రంప్ వేడుక, మోదీ-ట్రంప్ మైత్రి వల్ల.. గుజరాతీలు ట్రంప్కు అండగా నిలిచే అవకాశాలున్నాయని చెబుతున్నారు.
"చాలామంది ప్రవాసీలు డెమొక్రాట్లకే మద్దతు తెలిపే అవకాశాలున్నాయి. ప్రస్తుతం అక్కడ సమాజం ప్రమాదకరంగా మారుతోంది. శ్వేతజాతీయుల అధిపత్య ధోరణి చాలా చోట్ల మైనార్టీలను కలవరపెడుతోంది.
-ప్రొఫెసర్ రాజన్ కుమార్, అంతర్జాతీయ అంశాల నిపుణలు, జేఎన్యూ
అదే సమయంలో.. అధ్యక్ష అభ్యర్థుల మొదటి సంవాదంలో ఈ పెడ ధోరణి అడ్డుకోవటానికి ఏ విధమైన చర్యలు తీసుకుంటున్నారని అధ్యక్షుడిని ప్రశ్నించినప్పుడు... ఆయన సమాధానం మరిన్ని అనుమానాలను పెంచిందని చెబుతున్నారు.
ఈ అంశంపై ట్రంప్ నోరు మెదపలేదు. సమాధానం దాటవేశారు. ఇది కేవలం మెక్సికన్లు, నల్లజాతీయుల్లోనే కాదు.. అక్కడున్న అన్ని మైనార్టీ వర్గాల్లో భయాందోళనలు పెంచుతుంది.
-ప్రొఫెసర్ రాజన్ కుమార్, అంతర్జాతీయ అంశాల నిపుణలు, జేఎన్యూ
అమెరికాలో ప్రధానంగా మైనార్టీలుండే టెక్సాస్, కెంటకీ రాష్ట్రాల్లో పెరుగుతున్న హింస, వర్ణవివక్ష వల్ల రాత్రిపూట బయటకు రావాలంటేనే భయపడే పరిస్థితులు తలెత్తాయని పరీశీలకులు చెబుతున్నారు. ప్రభుత్వం వీరికి భరోసా కల్పించలేకపోతుందన్న అభిప్రాయాలు వ్యక్తమవుతున్నాయి.
బైడెన్ వెంటే ప్రవాస భారతీయులు
నివేదికల ప్రకారం అధ్యక్ష ఎన్నికల్లో భారతీయుల మద్దతు చూసుకుంటే..
బైడెన్- 66%
ట్రంప్- 28%
ఎటూ తేల్చుకోనివారు- 6%
అయితే, భారీ సంఖ్యలో ఓట్లను జో బైడెన్ దక్కించుకుంటారని చెబుతున్నా.. గత ఎన్నికల కంటే తక్కువే ఉండొచ్చన్న వాదనలు వినిపిస్తున్నాయి.
2016లో భారతీయుల మద్దతు..
హిల్లరీ క్లింటన్- 77%
డొనాల్డ్ ట్రంప్- 16%
ప్రస్తుతం అమెరికాలో ఉన్న భారతీయుల్లో..
54%- డెమొక్రాట్ల మద్దతుదారులు
16%- రిపబ్లికన్ల మద్దతుదారులు
24%- స్వతంత్రులు
దాదాపు 98% మంది భారతీయ అమెరికన్లు.. రానున్న అధ్యక్ష ఎన్నికల్లో ఓట్లు వేస్తామని తెలిపారు.
ఇండో-అమెరికన్లలో ఆందోళన
అమెరికాలో శ్వేతజాతీయుల హింస పెరిగిపోతున్న నేపథ్యంలో.. ట్రంప్ భారత పర్యటన తర్వాత అధ్యక్షుడికి భారతీయుల్లో మద్దతు భారీగా పెరిగింది. ఇతర దేశీయుల్లా కాకుండా.. భారతీయులను ప్రత్యేకంగా చూస్తారని అభిప్రాయపడ్డారు కొందరు ఇండో-అమెరికన్లు.
కానీ, పరిస్థితులు పూర్తిగా మారిపోతున్నాయి. శ్వేతజాతీయుల జాత్యాహంకారం కారణంగా.. వలసదారులపై దాడులు ఎక్కువయ్యాయి. కరోనా సంక్షోభంలో ట్రంప్ ఆర్థిక నిర్ణయాలు మరింత చేటు చేశాయని వాపోతున్నారు. ఈ అంశాల మద్దతుదారుల్లో ఆందోళన పెంచుతున్నాయని.. క్రితం సారిలా ట్రంప్ వెంట ప్రవాసీలు నిలవకపోవచ్చని చెబుతున్నారు విశ్లేషకులు.
అలాగే, ప్రస్తుతం అమెరికాలో నెలకొన్న పరిస్థితుల దృష్ట్యా.. భారతీయులు ట్రంప్ ఓడిపోతారనే భావనలో ఉన్నారని, అందుకే బైడెన్వైపు మొగ్గుచూపే అవకాశాలున్నయని చెబుతున్నారు.
అయితే, ట్రంప్-మోదీ మైత్రి బంధం ప్రభావం కారణంగా గుజరాతీలు ఎక్కువగా ట్రంప్వైపే నిలబడే అవకాశాలున్నాయని అంటున్నారు.
భారతీయులను ఆకట్టుకునేందుకు..
ఉపాధ్యక్ష అభ్యర్థిగా కమలా హ్యారిస్ను ఎంపిక చేసుకోవటం.. భారతీయ అమెరికన్లలో బైడెన్కు మరింత భరోసా పెంచింది. భారతీయ మూలాలున్న కమల ఎంపిక వల్ల... ప్రచారంలోనూ డెమొక్రాట్ల జోష్ కనిపిస్తోంది.
మొత్తంగా ట్రంప్-బైడెన్ ఇద్దరూ.. అమెరికాలో ఉన్న 18లక్షల మంది భారతీయ ఓటర్లను ఆకట్టుకోవటంపై ప్రత్యేక దృష్టి పెట్టారు. హోరాహోరీ పోరు తప్పదని భావిస్తోన్న ఫ్లోరిడా, పెన్సిల్వేనియా, మిషిగాన్ రాష్ట్రాల్లో వీరి ఓట్లు కీలకంగా ఉంటాయి. ఫలితాలు ప్రభావితం చేసే స్థాయిలో... నిర్ణయాత్మక శక్తిగా ఉండే భారతీయ ఓటర్లను ఆకర్షించటం ఇద్దరు అభ్యర్థులకు ప్రాధాన్యాంశమైంది.
ఆసియా, పసిఫక్-అమెరికన్ల గణాంకాలు లెక్కించే అప్లికేషన్ ప్రోగ్రామింగ్ ఇంటర్ఫేస్-ఏఏపీఐ సర్వే డేటా ప్రకారం.. అమెరికాలోని కీలక రాష్ట్రాల్లో భారత-అమెరికన్ ఓటర్ల సంఖ్య పరిశీలిస్తే..
రాష్ట్రం
ఓటర్లు
ఫ్లోరిడా
87,000
పెన్సిల్వేనియా
61,000
మిషిగాన్
45,000
ప్రస్తుతానికి సర్వేలన్నీ.. అమెరికా అధ్యక్ష ఎన్నికల్లో ప్రవాస భారతీయుల మద్దతు డెమొక్రాట్ల అభ్యర్థి బైడెన్వైపే ఉందని చెబుతున్నాయి. అయితే, పోలింగ్కు సమయం ఉండటం, ప్రచారం ఇప్పుడే ఊపందుకోవటం ఆసక్తి రేపుతున్నాయి. 2016లోనూ భారతీయులు భారీగా హిల్లరీకి మద్దతిచ్చినా... ట్రంప్ విజేతగా నిలిచారు.
