కరోనా మహమ్మారి బారి నుంచి కోలుకుని డిశ్చార్జి అయిన తర్వాత తొలిసారి బహిరంగ ప్రసంగం చేశారు అమెరికా అధ్యక్షుడు డొనాల్డ్ ట్రంప్. ఈ సందర్భంగా తాను చాలా ఆరోగ్యంగా ఉన్నానని తన మద్దతుదారులకు భరోసా కల్పించారు.
శ్వేతసౌధంలోని సౌత్లాన్స్లోని బాల్కనీ నుంచి ప్రసంగించారు ట్రంప్. ఈ కార్యక్రమానికి వందల మంది రిపబ్లికన్ మద్దతుదారులు బ్లూ టీ-షర్టులు, 'మరోమారు అమెరికాను గొప్పగా తయారు చేద్దాం' అని రాసి ఉన్న క్యాపులను ధరించి హాజరయ్యారు.
" నేను చాలా ఆరోగ్యంగా ఉన్నాను. నా గురించి ప్రార్థించినందుకు మీకు కృతజ్ఞతలు చెప్పాలనుకుంటున్నా. మన దేశ చరిత్రలో ఇదే అతి ముఖ్యమైన ఎన్నిక. బయటకు వచ్చి ఓటు వేయండి. నేను మిమ్మల్ని ప్రేమిస్తున్నా. ఫ్లోరిడా, నార్త్ కరోనాలినా, నేవడా, జార్జీయా, టెక్సాస్ వంటి అన్ని ప్రాంతాల్లో మనకు మంచి మద్దతు లభించింది. "
-డొనాల్డ్ ట్రంప్, అమెరికా అధ్యక్షుడు
డెమొక్రటిక్ పార్టీ అధ్యక్ష అభ్యర్థి జో బైడెన్, ఉపాధ్యక్ష అభ్యర్థి కమలా హారిస్లపై విమర్శలు చేశారు ట్రంప్. వారు వామపక్ష భావజాల రాజకీయ నేతలని ఎద్దేవా చేశారు. అశాస్త్రీయ లాక్డౌన్ల ద్వారా కరోనాను కట్టడి చేయగలమని వారు భావిస్తున్నారని విమర్శించారు. రిపబ్లికన్ మద్దతుదారులు.. 'మరో నాలుగు సంవత్సరాలు, మేము మిమ్మల్ని ప్రేమిస్తున్నాం' అనే నినాదాలతో హోరెత్తించిన క్రమంలో.. ఎన్నికల్లో వారిని చిత్తుగా ఓడించబోతున్నామని భావిస్తున్నట్లు చెప్పారు ట్రంప్. కరోనా నుంచి కోలుకోవాలని తన కోసం, మెలానియా కోసం ప్రార్థనలు చేసిన మద్ధతుదారులకు కృతజ్ఞతలు తెలిపారు ట్రంప్. అమెరిక సైన్స్, మెడిసిన్తో చైనా వైరస్ను సమూలంగా నిర్మూలిస్తామని విశ్వాసం వ్యక్తం చేశారు.
అధ్యక్షుడు ట్రంప్ (74), ప్రథమ మహిళ మెలానియా ట్రంప్(50)లకు గత వారం కరోనా సోకింది. చికిత్స నిమిత్తం సైనిక ఆసుపత్రిలో చేరారు ట్రంప్. నాలుగు రోజుల తర్వాత శ్వేత సౌధానికి తిరిగివచ్చారు. అనంతరం తొలిసారి రిపబ్లికన్ మద్దతుదారులతో నేరుగా మాట్లాడారు.
ఇదీ చూడండి: 'శ్వేతసౌధంలో కరోనా విజృంభణకు ఆ సమావేశమే కారణం'
