'భారత్​-చైనా మధ్య ఉద్రిక్తతలు పెంచేందుకు ప్రయత్నించొద్దు'

భారత్​-చైనా సరిహద్దు వివాదాన్ని పరిష్కరించేందుకు తాను మధ్యవర్తిత్వం వహిస్తానని అమెరికా అధ్యక్షుడు డొనాల్డ్​ ట్రంప్ చేసిన ప్రతిపాదనపై ఐరాస ప్రధాన కార్యదర్శి ఆంటోనియో గుటెరస్ విభిన్నంగా ప్రతిస్పందించారు. ఎవరు మధ్యవర్తిత్వం వహించాలన్నది తమ పరిధిలో లేని విషయమని తేల్చిచెప్పారు. అయితే భారత్​-చైనాల మధ్య ఉద్రిక్తతలు మరింత పెరగకుండా చూడాలని విజ్ఞప్తి చేశారు.

భారత్​-చైనాల సరిహద్దు వివాదం మరింత ఉద్రిక్తం కాకుండా నివారించాలని ఐరాస ప్రధాన కార్యదర్శి ఆంటోనియో గుటెరస్ కోరారు. భారత్​-చైనా సరిహద్దు వివాదం పరిష్కరించేలా అమెరికా అధ్యక్షుడు డొనాల్డ్​ ట్రంప్ మధ్యవర్తిత్వం చేయగలరా? అన్న ప్రశ్నకు... ఇది తమ పరిధిలో లేని విషయమని స్పష్టం చేశారు.

భారత్​-చైనాల సరిహద్దు వివాదాన్ని పరిష్కరించేందుకు తాను మధ్యవర్తిత్వం వహించేందుకు సిద్ధంగా ఉన్నానని అమెరికా అధ్యక్షుడు డొనాల్డ్​ ట్రంప్ ప్రతిపాదించారు. ఈ నేపథ్యంలో గుటెరస్​ కీలక వ్యాఖ్యలు చేశారు.

"భారత్​-చైనాల సరిహద్దు వివాదంపై ఎవరు మధ్యవర్తిత్వం వహించాలో ఐరాస ప్రధాన కార్యదర్శి సూచించలేరు. అయితే జరుగుతున్న పరిణామాలన్నీ ఆయన పరిశీలిస్తున్నారు. ఈ రెండు ఆసియా దిగ్గజాల మధ్య ఉద్రిక్తతలు మరింత పెరగకుండా చూడాలని ఆయన విజ్ఞప్తి చేశారు."

- స్టీఫెన్​ డుజారిక్​, ఐరాస అధికార ప్రతినిధి

భారత్​-చైనాలు 3,500 కి.మీ మేర సరిహద్దును పంచుకుంటున్నాయి. అయితే లద్ధాఖ్​లోని గాల్వన్​​, ఉత్తర సిక్కింల్లోని నియంత్రణ రేఖ వెంబడి ఇరుదేశాల మధ్య సరిహద్దు వివాదం చెలరేగింది. దీనితో ఇరుదేశాలు ఆయా ప్రాంతాల్లో అదనపు బలగాలను మోహరించాయి. గాల్వన్​ వద్ద భారత్ అక్రమ నిర్మాణాలు చేపడుతోందని చైనా చేస్తున్న ఆరోపణలను భారత విదేశాంగమంత్రిత్వ శాఖ తీవ్రంగా ఖండించింది.

ఇదీ చూడండి:చైనా భద్రతా చట్టంపై చర్చించాలని ఐరాసకు అమెరికా పిలుపు