సింగపూర్​లో కరోనా తగ్గుముఖం-కనిష్ఠ కేసులు నమోదు!

ప్రపంచవ్యాప్తంగా కరోనా కేసుల సంఖ్య 3 కోట్ల ఒక లక్షా 2 వేలు దాటింది. ఇప్పటివరకు 9 లక్షల 46 వేల మందికిపైగా కొవిడ్​కు బలయ్యారు. రష్యాలో 5 వేలు, మెక్సికోలో 4 వేలకుపైగా కొత్త కేసులు నమోదయ్యాయి. 6 నెలల తర్వాత సింగపూర్​లో అతితక్కువగా 18 కేసులు నమోదయ్యాయి.

కరోనా రక్కసి కోరలు చాస్తూనే ఉంది. ప్రపంచ దేశాల్లో రోజూ భారీ స్థాయిలో కేసులు నమోదవుతున్నాయి. అమెరికా, బ్రెజిల్​, రష్యా, మెక్సికోలపై వైరస్​ ప్రభావం అధికంగా ఉంది. మొత్తం కేసులు 3 కోట్ల, ఒక లక్ష దాటాయి. మరణాల సంఖ్య 9 లక్షల 46 వేలను అధిగమించింది.

• రష్యాలో గురువారం ఒక్కరోజు 5, 762 కొత్త కేసులు బయటపడ్డాయి. మరో 144 మరణాలతో మొత్తం మృతుల సంఖ్య 19 వేలు దాటింది.
• మెక్సికోలో మరో 4444 కేసులు.. 300 మరణాలు నమోదయ్యాయి.
• అర్జెంటీనా, ఇరాన్​, ఇండోనేసియాలో కరోనా తీవ్రత పెరిగిపోతోంది. రోజూ వందమందికిపైగా చనిపోతున్నారు.
• నేపాల్​లో కరోనా కేసులు 60 వేలకు సమీపంలో ఉన్నాయి. ఇవాళ ఒక్కరోజే 12 వందలమందికిపైగా కొవిడ్​ బారినపడ్డారు. ఆ దేశంలో ఇప్పటివరకు 383 మంది చనిపోయారు.
• దక్షిణాఫ్రికాలో కోటీ 20 లక్షల మందికిపైగా కరోనా బారినపడి ఉండొచ్చని అభిప్రాయం వ్యక్తం చేశారు ఆ దేశ ఆరోగ్య మంత్రి. అయితే మరణాల రేటు మాత్రం ఆ స్థాయిలో లేదన్నారు. అధికారిక లెక్కల ప్రకారం సౌతాఫ్రికాలో ఇప్పటివరకు 6 లక్షల 53 వేల మందికిపైగా కరోనా సోకింది. 15 వేల 705 మంది మరణించారు.
• సింగపూర్​లో గురువారం 18 మందికి కరోనా సోకింది. గత 6 నెలల్లో ఇదే అత్యల్పం. దేశంలో మొత్తం కేసులు 57 వేల 532కు చేరాయి. కరోనా వ్యాప్తి తగ్గుతున్న క్రమంలో.. సింగపూర్​లో చదువుకునే విదేశీయులు కొత్త సెమిస్టర్ల కోసం ఇప్పుడిప్పుడే అక్కడికి చేరుకుంటున్నారు.