జార్జి ఫ్లాయిడ్​ కుటుంబ సభ్యుల ర్యాలీ

జార్జిఫ్లాయిడ్​ కుటుంబసభ్యులు మినియాపొలిస్​లో ఆదివారం ర్యాలీ నిర్వహించారు. ఫ్లాయిడ్​ మృతిచెంది ఏడాది కావస్తున్న నేపథ్యంలో ఈ ర్యాలీ జరిపినట్లు తెలుస్తోంది. దేశవ్యాప్తంగా జార్జి కుటుంబసభ్యులు వివిధ కార్యక్రమాలు నిర్వహిస్తున్నారు.

నల్లజాతీయుడు జార్జి ఫ్లాయిడ్​ హత్యకు గురై ఏడాది కావస్తున్న నేపథ్యంలో అమెరికాలోని మినియాపొలిస్​లో అతని కుటుంబసభ్యులు ఆదివారం ర్యాలీ నిర్వహించారు. పోలీస్​ కాల్పుల్లో తమ వాళ్లను పోగొట్టుకున్న ఇతర నల్లజాతీయులు కూడా ఈ ర్యాలీలో పాల్గొన్నారు. మంగళవారం నాటికి ఫ్లాయిడ్​ మృతిచెంది ఏడాది కానుంది. ఈ నేపథ్యంలో జార్జి ఫ్లాయిడ్​ మెమోరియల్​ ఫౌండేషన్ తరఫున అతని కుటుంబసభ్యులు దేశవ్యాప్తంగా వివిధ కార్యక్రమాలు నిర్వహిస్తున్నారు.

నా సోదరుడిని మరువద్దు..

తన సోదరుడిని మరువద్దని ప్రజలకు పిలుపునిచ్చారు జార్జి సోదరుడు టెర్రెన్స్​ ఫ్లాయిడ్​. 'నా సోదరుడిని గుర్తుంచుకోవడం ద్వారా జాత్యహంకార బాధితులు అందరినీ మీరు గుర్తుంచుకున్నట్లే' అని టెర్రెన్స్​ అన్నారు.

గతేడాది పోలీసు అధికారి డెరిక్​ చౌవిన్​.. జార్జిఫ్లాయిడ్​ మెడపై మోకాలు మోపి కర్కశంగా హింసించి అతని మరణానికి కారణమయ్యాడు.

ఇదీ చదవండి :క్యాపిటల్​ భవనం వీడనున్న నేషనల్ గార్డ్స్​!