కంచెను ఢీకొని కూలిన విమానం.. నలుగురు మృతి

​​​​​​​దక్షిణ కాలిఫోర్నియాలో ఓ మినీ విమానం కూలిపోయి నలుగురు మరణించారు. టేక్​ఆఫ్ అవుతున్న క్రమంలో విమానాశ్రయం చుట్టూ ఉండే కంచెను ఢీకొట్టడం వల్ల మంటలు చెలరేగి.. రన్​వేకు సమీపంలో కూలిపోయింది. ప్రమాదం అనంతరం విమానాశ్రయాన్ని మూసివేశారు అధికారులు.

దక్షిణ కాలిఫోర్నియాలో బుధవారం ఓ మినీ విమానం ప్రమాదానికి గురైంది. టేక్​ఆఫ్​ చేస్తున్న క్రమంలో విమానాశ్రయం చుట్టూ ఉండే కంచెను ఢీకొట్టి కూలిపోయింది. ఈ దుర్ఘటనలో నలుగురు ప్రాణాలు కోల్పోయారు.

ఇదీ జరిగింది...

కాలిఫోర్నియాలోని కరోనా మున్సిపల్​ విమానాశ్రయం నుంచి టేక్​ఆఫ్​ అవుతున్న క్రమంలో మూడు అడుగుల ఎత్తుగల కంచెను ఢీకొట్టినట్లు ప్రత్యక్ష సాక్షులు చెప్పారు. వెంటనే మంటలు అంటుకుని రన్​వేకు కొద్ది దూరంలో కూలిపోయినట్లు వెల్లడించారు.

విమానాశ్రయానికి తూర్పు భాగంలో దగ్ధమైన విమానాన్ని గుర్తించారు అధికారులు. ప్రమాదం జరిగిన వెంటనే అగ్నిమాపక సిబ్బంది ఘటనాస్థలానికి చేరుకుని మంటలు అదుపు చేశారు. విమానంలో ప్రయాణిస్తున్న నలుగురు మృతిచెందినట్లు నిర్ధరించారు అధికారులు.

విమానాశ్రయానికి అతి సమీపంలో ప్రమాదం జరిగిన కారణంగా రన్​వేను మూసివేశారు అధికారులు. ఇక్కడకు రావాల్సిన విమానాలను దారిమళ్లించారు.

ఇదీ చదవండి:రహదారి నిర్మాణ యంత్రాలను తగలబెట్టిన నక్సల్స్