ఆ దేశంలో కారులోనే ఒక్కటవుతున్న ప్రేమజంటలు!

కరోనా మహమ్మారి కారణంగా వివాహాలు, శుభకార్యాలు వాయిదా పడ్డాయి. కానీ, ప్రేమకంటే గొప్పదేదీ లేదని.. మరణం కంటే ప్రేమే బలమైనదని చాటిచెబుతున్నాయి బ్రెజిల్​లోని ప్రేమజంటలు. ఇంతకి వారు ఏం చేశారు? వారి ప్రేమ ఎలా సాకారమైందో తెలుసుకోవాలంటే ఈ కథ చదివేయండి.

'మరణం కంటే ప్రేమ గొప్పది' అని నిరూపిస్తున్నారు బ్రెజిల్​ ప్రేమికులు. కరోనా కాలంలోనూ తమ ప్రేమను నిరూపించుకుంటూ ఔరా అనిపిస్తున్నారు. వైరస్​ విజృంభణతో బ్రెజిల్​ వ్యాప్తంగా కఠిన ఆంక్షలు అమల్లో ఉన్నాయి. ఈ నేపథ్యంలో లాక్​డౌన్​ ముగిసేవరకూ వేచిచూడకుండా.. వినూత్నంగా కారులోనే పరస్పరం రింగ్​లు మార్చుకుంటున్నారు. వివాహం చేసుకోవడానికి ఇదీ ఒక మార్గమని చాటిచెబుతున్నారు.

అంతా కారులోనే..

కారులోనే వివాహం చేసుకునే విధంగా.. 'డ్రైవ్-థ్రూ వెడ్డింగ్' పేరిట వినూత్న కార్యక్రమం ప్రారంభించారు రియో డి జెనీరోలోని రిజిస్ట్రేషన్ అధికారులు.

వివాహం చేసుకోదలచిన వారు.. ఒక సాక్షితో కలిసి రిజిస్ట్రేషన్​ కార్యాలయానికి వస్తారు. కారు దిగకుండానే అక్కడి సిబ్బందితో తమ పేర్లను నమోదు చేసుకుంటారు. అనంతరం ఒకరికొకరు ఉంగరాలు మార్చుకుంటారు. అంతే.. వీరి పెళ్లిని ధ్రువీకరిస్తున్నట్లు ప్రకటిస్తారు అధికారులు.

లాక్​డౌన్​ కాలంలో ప్రేమజంటలు వివాహం చేసుకోవడానికి ఇదొక మంచి మార్గమని రిజిస్ట్రేషన్​ కార్యాలయ అధికారి తెలిపారు.

'సాధారణ వేడుకల కంటే వేగంగా.. సురక్షితంగా ఈ కార్యక్రమాన్ని నిర్వహిస్తున్నాం. దీనిని చాలా మంది అనుసరిస్తున్నారు. నిబంధనల ప్రకారమే ప్రేమజంటలకు వివాహం చేస్తున్నాం.'

- అలెశాండ్రా లెపోయెంటె, కార్యాలయ అధికారి

ఇదీ చదవండి:మరోసారి పేలిన స్పేస్‌ఎక్స్‌ రాకెట్‌