అమెరికా అధ్యక్షుడు బైడెన్ బృందంలో భారతీయ-అమెరికన్లకు పెద్దపీట వేశారు. వారిలో ఒకరు స్పీచ్రైటెర్ వినయ్రెడ్డి. ప్రస్తుతం ఆయన పేరు మార్మోగిపోతోంది. బైడెన్ ప్రమాణస్వీకారం సందర్భంగా చేసిన ప్రసంగాన్ని రాసిన వినయ్.. అందరి ప్రశంసలు అందుకుంటున్నారు. బైడెన్ తన పాలనలో సాధించబోయే లక్ష్యాలు, అగ్రరాజ్యం ఎదుర్కొంటున్న సవాళ్లు, ఐకమత్యం, ప్రజాస్వామ్యం ప్రాముఖ్యత వంటి అంశాల గురించి పదునైన పదాలతో ఎంతో గొప్పగా ప్రసంగించడమే ఇందుకు కారణం.
'బైడెన్ ప్రసంగం.. నమ్రతతో కూడుకున్నది, కఠినమైనది, గంభీరమైంది, ప్రశాంతమైంది, ఉత్తేజకరమైంది' అంటూ మైఖేల్ అనే చరిత్రకారుడు ట్వీట్ చేశారు.
బైడెన్ స్పీచ్లోని కొన్ని ఆణిముత్యాలు..
- ఈ రోజు చారిత్రకమైంది. అమెరికన్ల రోజు. ప్రజాస్వామ్యానిది. ఈ రోజు జరుపుకుంటున్న విజయోత్సవం ఏ ఒక్కరిదీ కాదు అందరిది. ప్రజాస్వామ్యం విలువైంది, సున్నితమైంది.
- ఐకమత్యం లేకపోతే శాంతి లేదు. అక్కడ కోపతాపాలే మిగులుతాయి. అభివృద్ధి ఉండదు. జాతి ఉండదు.. ఘర్షణలే జరుగుతాయి. దేశం చారిత్రక సంక్షోభాన్ని ఎదుర్కొంటోంది. ఇప్పుడు ఐకమత్యంతోనే ముందుకు వెళ్లగలం.
- కొన్ని రోజుల క్రితం జరిగిన హింసాత్మక ఘటనల తర్వాత ఇక్కడ శాంతియుతంగా సమావేశమవుతున్నాం. భయాందోళన నుంచి దూరంగా వెళ్లడం, హింసాత్మక ఘటనలు ఎప్పటికీ జరగకుండా ఉండడం ప్రజాస్వామ్యంతోనే సాధ్యం.
- బైడెన్ ఒకనొక సమయంలో 'అధ్యక్షుడు ప్రజలందరి కోసం..' అంటూ వ్యాఖ్యానించారు.
ఇలా బైడెన్ నోట జారువాలిన ప్రతి మాట తూటలా పేలింది. అందరినీ ఆకర్షించింది. ఆ మాటలన్ని వినయ్ హృదయాంతరాల్లోంచి బయటకు వచ్చి.. ఆయన కలం ద్వారా అక్షరరూపం దాల్చాయని చెప్పొచ్చు.
ఇదీ చూడండి:బైడెన్ బృందంలో కీలకంగా భారతీయులు!
