అమెజాన్​ బాస్​ ఫోన్​ హ్యాక్​ చేసిన సౌదీ యువరాజు!

అమెజాన్​ అధిపతి జెఫ్​ బెజోస్​ మొబైల్​ ఫోన్​ను సౌదీ యువరాజు హ్యాక్​ చేశారన్న వార్త సర్వత్రా చర్చనీయాంశమైంది. మహ్మద్ బిన్ సల్మాన్​ వాట్సాప్​ ద్వారా ఒకే ఒక్క మెసేజ్​ పంపి... బెజోస్​ ఫోన్​ నుంచి విలువైన సమాచారం తస్కరించినట్లు ఓ పత్రిక కథనం ప్రచురించింది.

జెఫ్​ బెజోస్​.... దిగ్గజ వ్యాపార సంస్థ అమెజాన్​ అధిపతి. ప్రపంచంలోనే అత్యంత సంపన్నుడు. అలాంటి వ్యక్తి మొబైల్​ ఫోన్​ను హ్యాక్​ చేయడం సాధ్యమేనా? ఔననే అంటోంది బ్రిటన్​కు చెందిన ప్రముఖ పత్రిక 'ద గార్డియన్​'. చేసింది కూడా సాధారణ హ్యాకర్​ కాదని, ఏకంగా సౌదీ అరేబియా యువరాజు మహ్మద్ బిన్ సల్మాన్​ అని చెబుతోంది.

అసలేం జరిగింది...?

ద గార్డియన్​ కథనం ప్రకారం... "హ్యాకింగ్ వ్యవహారం 2018లో జరిగింది. అప్పట్లో జెఫ్​ బెజోస్​, సల్మాన్ మధ్య సత్సంబంధాలు ఉండేవి. తరచూ వాట్సాప్​లో చాట్​ చేసుకునే వారు. అలానే మే 1న బెజోస్​కు సౌదీ అరేబియా యువరాజు నుంచి ఓ మెసేజ్​ వచ్చింది. అందులో ఒక వీడియో ఫైల్​ ఉంది. దానిపై క్లిక్ చేయగానే అమెజాన్​ బాస్​ ఫోన్​ హ్యాక్​ అయింది. కొన్ని గంటల వ్యవధిలోనే పెద్దమొత్తంలో సమాచారం బెజోస్​ ఫోన్​ నుంచి బయటకు వెళ్లిపోయింది."
అయితే... బెజోస్​ ఫోన్​ నుంచి ఏం సమాచారం చోరీకి గురైంది, తర్వాత ఏం జరిగిందన్న అంశంపై స్పష్టత ఇవ్వలేదు 'ద గార్డియన్'.

ఖండించిన సౌదీ..

అమెజాన్​ అధినేత జెఫ్​ బెజోస్​ ఫోన్​ హ్యాకింగ్​ వెనుక సౌదీ ఉన్నట్లు వస్తున్న వార్తలను ఆ దేశం ఖండించింది. మీడియాలో పేర్కొన్న అంశాలు అంసబ్ధమైనవని ట్విట్టర్​ వేదికగా స్పష్టంచేసింది వాషింగ్టన్​లోని సౌదీ రాయబార కార్యాలయం. ఈ వ్యవహారంపై దర్యాప్తు చేసి.. నిజానిజాలు తెలుసుకుంటామని పేర్కొంది.

అమెరికాలోని సౌదీ రాయబార కార్యాలయం ట్వీట్​

ఇదీ చూడండి: ఫొటోలు బహిర్గతం చేశారని మీడియాపై ప్రిన్స్​ హ్యారీ మండిపాటు