'పబ్​జీ'లో తొండి ఆట- 30వేల మందిపై 10ఏళ్ల నిషేధం!

పబ్​జీ ఆడుతున్నారా..? ప్రత్యర్థిపై పైచేయి సాధించేందుకు చీట్​ కోడ్స్​ వాడుతున్నారా...? అయితే జరభద్రం! మోసకారి ఆటగాళ్లను ఏమాత్రం ఉపేక్షించడంలేదు పబ్​జీ నిర్వాహకులు. తొండి ఆట ఆడారని ఇప్పటికే 30 వేల ఖాతాలను నిషేధించారు.

పబ్​జీ...! ఆన్​లైన్​ గేమింగ్​లో సరికొత్త సంచలనం. తుపాకులు, బాంబులతో బుల్లితెర యుద్ధభూమిని అదరగొడుతూ గంటలుగంటలు గడిపేస్తోంది యువత. కొందరైతే "విన్నర్​ విన్నర్​... చికెన్​ డిన్నర్​" అని అనిపించుకునేందుకు అడ్డదారులు తొక్కుతున్నారు. చీట్ కోడ్స్​ వాడుతున్నారు.

ఆటో ఎయిమింగ్, చీటింగ్​ టూల్స్​, వర్చువల్ టూల్స్​, మోడిఫైడ్​ ఇన్​-గేమ్ డేటాతో దొంగ ఆట ఆడుతున్నవారిపై గురిపెట్టారు పబ్​జీ నిర్వాహకులు. 'క్రీడా స్ఫూర్తి'ని దెబ్బతీసే అలాంటి వారిని ఏమాత్రం ఉపేక్షించరాదని నిర్ణయించారు. అందుకే సరికొత్త నిబంధనలు తీసుకొచ్చారు.

గీత దాటినవారిపై వేటు...

పబ్​జీలో చీట్​ చేసేవారిని ఇకపై నిర్వాహకులు బ్యాన్​ చేయనున్నారు. అది కూడా... ఒకట్రెండు రోజులు కాదు. ఏకంగా పదేళ్లు.
ఇలా గేమ్​లో చీట్​ చేసిన 30 వేల మందిపై ఒకేసారి నిషేధం విధించారు పబ్​జీ నిర్వాహకులు. ఆ ఖాతాల జాబితాను ట్విట్టర్​ ద్వారా వెల్లడించారు.

ఇదీ చూడండి : పండుగ వేళ ట్విస్ట్... తగ్గిన బంగారం ధర