Suresh Gopi Journalist Video : మలయాళ నటుడు, మాజీ ఎంపీ సురేశ్ గోపీ చిక్కుల్లో పడ్డారు. ఓ మహిళా జర్నలిస్ట్తో ఆయన ప్రవర్తించిన తీరు గురించి ఇప్పుడు సోషల్ మీడియా అంతటా చర్చనీయాంశంగా మారింది. దీంతో ఆయన సదరు విలేకరికి సారీ చెప్పారు. ట్విట్టర్ వేదికగా ఓ పోస్ట్ పెట్టి ఆమెను క్షమాపణలు కోరారు. "ఆమెను నేనొక కుమార్తెగా భావించాను. ఆ ఆప్యాయతతోనే భుజంపై చెయ్యి వేశాను. ఈ ఘటన పట్ల ఆమె అభిప్రాయాన్ని గౌరవిస్తున్నాను. నా ప్రవర్తన వల్ల ఆమె ఇబ్బందిపడి ఉంటే క్షమాపణలు చెబుతున్నాను" అని ఆయన రాసుకొచ్చారు.
అసలేం జరిగిందంటే..?
Suresh Gopi Tweet :నార్త్-కొయ్కోడ్లో జరిగిన ఓ కార్యక్రమంలో సురేశ్ గోపీ అతిథిగా పాల్గొన్నారు. కార్యక్రమం అనంతరం ఆయన పలువురు జర్నలిస్ట్లతో మాట్లాడారు. ఈ క్రమంలోనే ఓ మహిళా విలేకరికి సమాధానం చెబుతూ.. ఆమె భుజంపై చెయ్యి వేశారు. ఆయన ప్రవర్తనతో ఇబ్బందిపడిన సదరు విలేకరి కాస్త దూరం జరిగింది. అనంతరం, మరో ప్రశ్న అడిగేందుకు ఆమె ముందుకు రాగా.. ఆయన మరోసారి ఆమెను తాకారు. ఈ ఘటనపై పలువురు నెటిజన్లు, సినీ ప్రముఖులు ఆగ్రహం వ్యక్తం చేశారు. ఆయన తీరును తప్పుబట్టారు. దీంతో ఆయన క్షమాపణలు చెబుతూ పోస్ట్ పెట్టారు.
Suresh Gopi Movies List : మలయాళంలో సీనియర్ నటుడుగా పేరొందిన సురేశ్.. తన విలక్షణ నటనతో ప్రేక్షకులను మెప్పించారు. 'యువజనోత్సవం', 'పి.సి.369', 'సాయం సంధ్యా', 'న్యూ దిల్లీ', 'ది న్యూస్', 'పరంపర', 'డాడీ', 'ధ్రువమ్' వంటి చిత్రాలతో నటించి మంచి గుర్తింపు సొంతం చేసుకున్నారు. 'అంతిమ తీర్పు', 'ఆ ఒక్కడు' లాంటి తెలుగు సినిమాల్లోనూ ఆయన నటించారు.