Kantara 2 update : 'కాంతార-2' కోసం అది నేర్చుకుంటున్న​ డైరెక్టర్ ​రిషభ్​ శెట్టి!

Kantara 2 update : 'కాంతార-2' ఎప్పుడెప్పుడు వస్తుందా అని ఎంతో ఉత్సాహంగా వెయిట్​ చేస్తున్నారు అభిమానులు. అయితే ఈ సినిమాకు సంబంధించిన మరో ఇంట్రెస్టింగ్​ అప్​డేట్​ బయటకు వచ్చింది. అదేంటంటే?

Kantara 2 update : గతేడాది ఓ మామూలు సినిమాగా విడుదలై బాక్సాఫీస్​ వద్ద సంచలనం సృష్టించి, బ్లాక్​బస్టర్​ విజయం సాధించిన సినిమా 'కాంతార'. ప్రస్తుతం 'కాంతార-2' రూపొందుతోంది. అయితే ఈ సినిమా సీక్వెల్​ కాదని 'కాంతార' మొదటి భాగానికి ప్రీక్వెల్​అని దర్శకుడు రిషభ్​ శెట్టి ఇప్పటికే ప్రకటించారు. ఇదిలా ఉంటే ప్రస్తుతం ఈ ప్రాజెక్ట్​కు సంబంధించిన ఓ వార్త సోషల్​ మీడియాలో తెగ చక్కర్లు కొడుతోంది. అదే.. డైరెక్టర్​ రిషభ్​ శెట్టి ఈ సినిమా కోసం ప్రత్యేకంగా గుర్రపు స్వారీలో శిక్షణ తీసుకుంటున్నారన్న ప్రచారం జరుగుతోంది. దీంతో ఈ సినిమాపై ప్రేక్షకుల్లో అంచనాలు మరింతగా పెరిగాయి.

మరింత లోతుగా భూతకోల నేపథ్యం..
kantara 2 Shooting : ఇక ఈ సినిమా షూటింగ్‌ ఈ ఏడాది ఆగస్టు 27 నుంచి ప్రారంభం కానుందని తెలుస్తోంది. ప్రస్తుతం స్క్రిప్టింగ్​ పనులు జరుగుతున్నాయి. రిషభ్​ శెట్టి స్వీయ దర్శకత్వంలో యాక్షన్ థ్రిల్లర్​గా రూపొందిన 'కాంతార' పార్ట్​ 1ను తక్కువ బడ్జెట్‌తో నిర్మించారు. అయితే రెండో భాగం కోసం మాత్రం భారీగానే బడ్జెట్​ను ఖర్చు చేయనున్నారట నిర్మాత చలువే గౌడ. అలాగే ఇందులో భూతకోల నేపథ్యాన్ని మరింత లోతుగా చూపనున్నారట. ఇక వచ్చే ఏడాది దీన్ని ప్రేక్షకుల ముందుకు తీసుకురావాలని భావిస్తున్నారు మూవీ మేకర్స్‌. దర్శకుడు రిషభ్ గతంలో ఓ ఇంటర్వ్యూలో 'కాంతార-2'కి సంబంధించి కొన్ని విషయాలను పంచుకున్నారు. ప్రకృతి నేపథ్యంలో తెరకెక్కిన తొలి భాగం కథ ఎక్కడైతే ప్రారంభమైందో.. దానికి ముందు జరిగిన సంఘటనలను 'కాంతార' ప్రీక్వెల్‌లో చూపెట్టనున్నట్లు తెలిపారు. అలాగే పంజుర్లికి సంబంధించిన సన్నివేశాలు కూడా ఎక్కువగా ఉంటాయని చెప్పారు.

ఆస్కార్​ రేసులో..
kantara Oscar : గతేడాది సెప్టెంబర్‌లో భారీ అంచనాల మధ్య కన్నడలో రిలీజైన ఈ మూవీ మొదటి రోజు నుంచే పాజిటివ్‌ టాక్‌ తెచ్చుకుని భారీ వసూళ్లు సాధించింది. ఇక ఈ సినిమాకు వచ్చిన ఆదరణతో దీన్ని మరిన్ని భాషల్లో విడుదల చేయాలని డిమాండ్‌లు కూడా వచ్చాయంటే ఈ చిత్రాన్ని ప్రేక్షకుల ఎంతలా ఓన్​ చేసుకున్నారో అర్థం చేసుకోవచ్చు. దీంతో మేకర్స్‌ తెలుగుతో పాటు హిందీ, తమిళం, మలయాళ భాషల్లో ఈ చిత్రాన్ని డబ్ చేసి రిలీజ్‌ చేశారు. ఇక విడుదలైన ప్రతి భాషలో భారీ వసూళ్లను రాబట్టి బ్లాక్‌బస్టర్​గా నిలిచిందీ సినిమా. ఈ సినిమా కలెక్షన్ల పరంగానే కాదు అవార్డుల్లోనూ సరికొత్త రికార్డులను సృష్టించింది. భారత్​ తరఫున ఆస్కార్‌కు నామినేట్‌ అయిన పది సినిమాల్లో ఇది కూడా ఒకటి కావడం విశేషం.

• ఇవీ చదవండి: