Balakrishna Movies : సంక్రాంతి బరిలోకి దిగి 'వీరసింహారెడ్డి' చిత్రంతో టాలీవుడ్ స్టార్ హీరో నందమూరి బాలకృష్ణ.. సూపర్ హిట్ అందుకున్నారు. గతేడాది విడుదలైన 'అఖండ' సినిమాతో మంచి ఫాంలో ఉన్న బాలయ్య.. అదే దూకుడు ఈ ఏడాది కూడా కొనసాగిస్తున్నారు. ప్రస్తుతం ఆయన స్టార్ డైరెక్టర్ అనిల్ రావిపూడితో సినిమా చేస్తున్నారు. ఈ చిత్రానికి 'భగవత్ కేసరి' అనే టైటిల్ ఫైనల్ చేసినట్టు సమాచారం. జూన్ 10న బాలకృష్ణ పుట్టినరోజు సందర్భంగా ఈ టైటిల్‌ను ప్రకటించనున్నారని ఇండస్ట్రీ వర్గాలు తెలిపాయి. అయితే అదేరోజు మరో ప్రకటన కూడా రాబోతుందట. అదే 'హిట్-4' అనౌన్స్మెంట్ అంట.
Hit Franchise Telugu : 'హిట్: ది ఫస్ట్ కేస్' సినిమాతో దర్శకుడు శైలేశ్ కొలను సినీ ఇండస్ట్రీకి పరిచయమయ్యారు. విశ్వక్ సేన్ హీరోగా ఈ సినిమాను తెరకెక్కించి విజయం సాధించారు. ఆ తరవాత గతేడాది 'హిట్: ది సెకండ్ కేస్'ను ప్రేక్షకుల ముందుకు తీసుకొచ్చారు. ఇందులో అడివి శేష్ హీరోగా నటించారు. ఈ సినిమా విడుదల సమయంలోనే హిట్ యూనివర్స్ గురించి శైలేశ్ కొలను ప్రకటన చేశారు. పలువురు హీరోలతో వరుసగా హిట్ ఫ్రాంచైజ్‌ను తీయనున్నట్టు చెప్పారు. ఈ ఫ్రాంచైజ్‌లో చాలా సినిమాలు వస్తాయన్న శైలేశ్.. అన్ని కేసులను కలుపుతూ ఒక సినిమా ఉంటుందని కూడా తెలిపారు.
Balakrishna HIT Universe : అయితే ఈ 'హిట్ యూనివర్స్'లో భాగంగా రాబోతున్న మూడో సినిమాలో నేచురల్ స్టార్ నాని హీరోగా నటిస్తున్నారు. దీనికి సంబంధించిన ప్రకటన ఇప్పటికే వచ్చేసింది. ప్రస్తుతం విక్టరీ వెంకటేష్‌తో 'సైంధవ్' సినిమా తెరకెక్కిస్తున్న శైలేశ్ కొలను.. ఈ సినిమా పూర్తిచేసిన తరువాత 'హిట్ 3'ని పట్టాలెక్కిస్తారు. అయితే, ఆ సినిమా ఇంకా సెట్స్‌పైకి వెళ్లకముందే 'హిట్ 4'ను కూడా ప్లాన్ చేస్తున్నారట శైలేశ్.
ఈ సినిమాలో నందమూరి బాలకృష్ణను హీరోగా అనుకుంటున్నారట. ఇప్పటికే బాలకృష్ణకు శైలేశ్ కథ వినిపించారట. బాలయ్యకు కథ కూడా నచ్చిందని సమాచారం. అయితే, ఇంకా ఆయన దగ్గర నుంచి గ్రీన్ సిగ్నల్ రాలేదని తెలుస్తోంది. అంతా శైలేశ్ అనుకున్నట్టు జరిగితే జూన్ 10న ఈ సినిమాకు సంబంధించి అధికారిక ప్రకటన వస్తుందని వినికిడి.
NBK 108 Update : మరోవైపు, అనిల్ రావిపూడి దర్శకత్వంలో రూపొందుతున్న సినిమాతో బాలయ్య బిజీగా ఉన్నారు. ఈ సినిమాలో ఆయన లుక్ ఇప్పటికే అభిమానులను విపరీతంగా ఆకట్టుకుంది. ఈ సినిమాలో బాలయ్యకు జంటగా కాజల్ అగర్వాల్ నటిస్తున్నారు. ఇక యంగ్ హీరోయిన్ శ్రీలీల.. బాలయ్యకు కుమార్తెగా కనిపించనున్నారు. బాలకృష్ణ గత రెండు సినిమాలకు సంగీతం అందించిన తమన్ ఈ సినిమాకు కూడా సంగీతం సమకూరుస్తున్నారు. షైన్ స్క్రీన్‌ బ్యానర్‌పై సాహు గారపాటి, హరీష్ పెద్ది నిర్మిస్తున్నారు.
