తెలుగు చిత్రపరిశ్రమ ఖ్యాతిని ప్రపంచదేశాలకు చాటిన చిత్రం 'బాహుబలి'. ఈ చిత్రంతో ప్రభాస్, రాజమౌళి క్రేజ్ అంతర్జాతీయ స్థాయిలో పెరిగింది. అలానే వీరిద్దరి మధ్య మంచి స్నేహబంధం కూడా ఉంది. పలు సందర్భాల్లో ఒకరిపై మరొకరు తమ అభిమానాన్ని కూడా చాటుకున్నారు. అయితే తాజాగా వీరిద్దరికి సంబంధించిన ఓ వీడియో సోషల్మీడియాలో వైరల్ అవుతోంది. ఇందులో ప్రభాస్, బాలీవుడ్ స్టార్ హృతిక్ రోషన్‌లను పోలుస్తూ రాజమౌళి మాట్లాడిన మాటలు మళ్లీ చక్కర్లు కొడతున్నాయి.
ప్రసుత్తం వైరలవుతోన్న ఈ వీడియో 2009లో ప్రభాస్ 'బిల్లా' సినిమా ఆడియో లాంచ్‌ సందర్భంగా తీసింది. దీంట్లో జక్కన్న మాట్లాడుతూ.. రెండేళ్ల కిందట 'ధూమ్‌ 2' విడుదలైనప్పుడు ఆ సినిమా చూసి నేను ఆశ్చర్యపోయాను. కేవలం బాలీవుడ్ వాళ్లు మాత్రమే ఇంత గొప్ప క్వాలిటీ సినిమాలు ఎలా తీయగలుగుతున్నారని అనుకునేవాడిని. మన సౌత్లో హృతిక్ రోషన్ లాంటి నటులు లేరా అని అనుకున్నా.. కానీ ఇప్పుడు బిల్లా సాంగ్స్‌, పోస్టర్స్‌, ట్రైలర్‌ చూశాకా.. ఒక్కటే చెప్పగలను.. ప్రభాస్ ముందు హృతిక్ రోషన్ నథింగ్‌' అని వ్యాఖ్యలు చేశారు రాజమౌళి. ఈ సందర్భంగా తెలుగు సినిమాను హాలీవుడ్‌ లెవల్‌కు తీసుకెళ్లే విధంగా కృషి చేసిన మెహర్‌ రమేష్‌కు థ్యాంక్స్‌ చెబుతున్నా అని అప్పట్లో అన్నారు రాజమౌళి. మరి ఈ వీడియోను నెటిజన్లు ఇప్పుడెందుకు ట్రెండ్ చేస్తున్నారో తెలీదు కానీ.. విపరీతంగా కామెంట్స్ పెడుతున్నారు.