Prabhas Maruthi: ప్రస్తుతం పాన్ ఇండియా స్టార్ ప్రభాస్ లైనప్ ఫుల్ బిజీగా ఉంది. మరో రెండేళ్ల వరకు అతడి డేట్స్ సర్దుబాటు కావడం కష్టమే. పలు భారీ బడ్జెట్ సినిమాలు చేస్తూ ఫుల్ బిజీగా ఉన్నారు డార్లింగ్. ఈ బిజీ షెడ్యూల్లోనే దర్శకుడు మారుతితో ఓ సినిమాకు గ్రీన్ సిగ్నల్ ఇచ్చారు ప్రభాస్. రాధేశ్యామ్ ప్రమోషన్స్లో మారుతితో సినిమా చేయబోతున్న విషయాన్ని వెల్లడించి అభిమానులను సర్ప్రైజ్ చేశారు. ప్రభాస్- మారుతి సినిమాకు సంబంధించి పలు వార్తలు చాలా రోజులుగా ప్రచారంలో ఉన్నాయి.
హారర్ కథాంశంతో ప్రయోగాత్మకంగా ఈ సినిమా ఉంటుందని వార్తలు వినిపిస్తున్నాయి. ఇందులో ముగ్గురు హీరోయిన్లు నటించనున్నట్లు, ఈ క్యారెక్టర్స్ కోసం మాళవికా మోహనన్, శ్రీలీలతో పాటు మరో నాయికను ఎంపికచేశారని ఊహాగానాలు వినిపించాయి. వీటిపై ఇన్నాళ్లు సైలెంట్గా ఉన్న దర్శకుడు మారుతి 'పక్కా కమర్షియల్' ప్రమోషన్స్లో ప్రభాస్తో సినిమాపై స్పష్టత నిచ్చారు. ఈ సినిమా కథ, హీరోయిన్ల విషయంలో వినిపిస్తున్న కథనాలన్నీ అవాస్తవమని తెలిపారు. హీరోయిన్లు ఎవరిని ఫైనల్ చేయలేదని అన్నారు.
పర్సనల్గా తాను ప్రభాస్ ఫ్యాన్నని, అతడిని అమితంగా అభిమానిస్తానని మారుతి తెలిపారు. ఫ్యాన్స్ అందరిలో ఉత్సాహాన్ని నింపే విధంగా ప్రభాస్తో పూర్తిస్థాయి కామెడీ సినిమా చేయాలనే ఆలోచనలో ఉన్నట్లు పేర్కొన్నారు. 'డార్లింగ్', 'బుజ్జిగాడు' నాటి ప్రభాస్ను తన సినిమాలో చూస్తారని, ఆ సినిమాల్లో ప్రభాస్ ఎంత ఉత్సాహంగా కనిపించారో అంతే జోష్, యాక్టివ్ నెస్ను తన సినిమాలో చూపించబోతున్నట్లు తెలిపారు. త్వరలోనే ఈ సినిమాకు సంబంధించిన అన్ని వివరాల్ని వెల్లడిస్తానని మారుతి అన్నారు.