Boyapati Rapo Release Date : ఎనర్జిటిక్ హీరో రామ్ పోతినేని, దర్శకుడు బోయపాటి శ్రీను కాంబినేషన్లో తెరకెక్కుతున్న చిత్రం ప్రస్తుతం అందరి అంచనాలను పెంచేస్తోంది. 'బోయపాటి రాపో' అనే వర్కింగ్ టైటిల్తో తెరకెక్కుతున్న ఈ సినిమా పాన్ ఇండియా రేంజ్లో విడుదల కానుంది. అయితే ఈ సినిమాకు సంబంధించిన ఓ న్యూస్ ప్రస్తుతం నెట్టింట చక్కర్లు కొడుతూ అభిమానుల్లో ఎక్స్పెక్టేషన్స్ పెంచేస్తోంది. ఈ క్రమంలో శుక్రవారం ఈ సినిమాకు సంబంధించిన ఓ పోస్టర్ను విడుదల చేసిన మూవీ టీమ్ సినిమా.. ప్రేక్షకుల కోసం రిలీజ్ డేట్ను ఖరారు చేసింది. ఓ పల్లెటూరి వాతావరణంలో మంచంపై పంచెకట్టులో కూర్చున్న రామ్.. ఇక ఆయన చేతిలో ఓ కాఫీ కప్.. ఇలా పచ్చటి పొలాల మధ్య స్టైలిష్ లుక్లో రామ్ కనిపిస్తున్నారు. 'వీ ఆర్ కమింగ్ ఇన్ ఎర్లీ'( మేము ముందుగానే వచ్చేస్తున్నాము) అంటూ ఆ పోస్ట్ను షేర్ చేసిన మూవీ టీమ్ అందులో సెప్టెంబర్ 15న సినిమాను విడుదల చేస్తున్నట్లు ప్రకటించారు.
అంటే అప్పట్లో ఈ సినిమాను అక్టోబర్ 20న విడుదల చేయనున్నట్లు తెలిపారు. దీంతో ఈ సినిమా కోసం దసరా వరకు వేచి చూడాలనుకున్న అభిమానులకు ఈ వార్త తీయ్యటి కబురులా అనిపించింది. అయితే ఇప్పటికీ ఆ పోస్టర్లో 'బోయపాటిరాపో' అనే వర్కింగ్ టైటిల్ ఉండటం వల్ల ఇంకా ఈ సినిమాకు పేరు ఎందుకు పెట్టలేదంటూ ఫ్యాన్స్ ఆవేదన వ్యక్తం చేస్తున్నారు. అయితే ఈ సినిమాకి సంబంధించి టైటిల్ విషయంలో చిత్ర బృందం మాత్రం 'స్కంద' అనే పేరు పెడితే ఎలా ఉంటుందనే విషయంపై చర్చిస్తున్నట్లు సమాచారం. దీనికి సంబంధించిన అధికారిక ప్రకటన కూడా త్వరలోనే వచ్చే అవకాశాలున్నాయని సినీ వర్గాల టాక్.