రాజమౌళి- మహేశ్‌ సినిమా పట్టాలెక్కేది​ అప్పుడేనట!

Rajamouli-Mahesh combo: రాజమౌళి, మహేశ్‌ బాబు కాంబినేషన్‌లో ఓ చిత్రం తెరకెక్కనున్న విషయం అందరికీ తెలిసిందే. అయితే ఆ సినిమా షూటింగ్​ ఎప్పుడు ప్రారంభం అవుతుందనే దానిపై క్లారిటీ ఇచ్చారు రాజమౌళి.

Rajamouli-Mahesh combo: ప్రముఖ దర్శకుడు రాజమౌళి, నటుడు మహేశ్‌ బాబు కాంబినేషన్‌లో ఓ చిత్రం తెరకెక్కబోతుంది. అధికారికంగా ప్రకటించకపోయినా పలు ఇంటర్వ్యూల్లో నిర్మాత కె. ఎల్‌. నారాయణ, రాజమౌళి ఈ విషయాన్ని వెల్లడించిన సంగతి తెలిసిందే. ఈ సమాచారం తెలిసిన క్షణం నుంచే సినీ అభిమానుల్లో అంచనాలు పెరిగాయి. మహేశ్‌ బాబును రాజమౌళి ఎలాంటి పాత్రలో చూపిస్తారు? ఏ నేపథ్యంలో సినిమాను తెరకెక్కిస్తారు? హీరోయిన్‌ ఎవరు? టైటిల్‌ ఏంటి? అనే ఉత్కంఠ అందరిలోనూ నెలకొంది. ఈ క్రమంలో ఎన్నో ఊహాగానాలు వచ్చాయి. వాటిని పక్కన పెడితే, ఈ సినిమాను ఎప్పుడు ప్రారంభించబోతున్నారో రాజమౌళి ఆంగ్ల మీడియాకు తెలిపారు. ‘‘స్టోరీని పక్కాగా సిద్ధం చేసుకునేందుకు, ప్రీ ప్రొడక్షన్‌కు సుమారు 7 నెలల సమయం పడుతుంది. ఈ ఏడాది చివరిలో షూటింగ్‌ ప్రారంభించాలనుకుంటున్నా’’ అని చెప్పారు. రామ్‌చరణ్‌, ఎన్టీఆర్‌లతో రాజమౌళి రూపొందించిన ‘ఆర్‌ఆర్‌ఆర్‌’ ఇటీవల విడుదలై, తెలుగు సినిమా రికార్డులను తిరగరాస్తోంది.

ఆసక్తిగా ‘పోలీసోడు’ ట్రైలర్‌

‘గజరాజు’ సినిమాతో తెలుగు వారికి దగ్గరైన తమిళ నటుడు విక్రమ్‌ ప్రభు. ఆయన హీరోగా తెరకెక్కిన తాజా చిత్రం ‘తానక్కరన్‌’ (తెలుగు టైటిల్.. పోలీసోడు). ఈ సినిమా నేరుగా ఓటీటీలో విడుదలకానుంది. తెలుగు, తమిళ, కన్నడ, మలయాళ భాషల్లో ఈ నెల 8 నుంచి ‘డిస్నీ+ హాట్‌స్టార్‌’లో స్ట్రీమింగ్‌కానుంది. ఈ నేపథ్యంలో చిత్ర బృందం ట్రైలర్‌ను విడుదల చేసింది. పోలీసు అధికారుల శిక్షణ నేపథ్యంలో ఈ చిత్రం తెరకెక్కినట్టు ట్రైలర్‌ చూస్తుంటే అర్థమవుతోంది. సీనియర్‌ శిక్షణాధికారి, కథానాయకుడి మధ్య సాగే సన్నివేశాలు సినిమాపై ఆసక్తి రేకెత్తించేలా ఉన్నాయి. తమిళ్‌ దర్శకత్వం వహించిన ఈ చిత్రంలో అంజలి నాయర్‌, లాల్‌, ఎం. ఎస్‌. భాస్కర్‌ తదితరులు కీలక పాత్రలు పోషించారు. పొటెన్షియల్‌ స్టూడియోస్‌ ఎల్‌.ఎల్‌.పి. సంస్థ నిర్మించిన ఈ చిత్రానికి జిబ్రాన్‌ సంగీతం అందించారు.