లైవ్​ వీడియో: ప్రశ్నించిన పోలీసులపై దాడికి యత్నం..!

కరోనా కష్ట కాలంలో ఓ వైపు ప్రాణాలను సైతం లెక్కచేయకుండా పోలీసులు విధులు నిర్వహిస్తుంటే.. మరోవైపు పోకిరీలు బాధ్యతారాహిత్యంగా రోడ్లపైకి వస్తున్నారు. అడ్డుకున్న పోలీసులపై విరుచుకు పడుతున్నారు. మరికొందరు ఏకంగా దాడులకు పాల్పడుతున్నారు. రాజేంద్రనగర్ పీఎస్​ పరిధిలోని సులేమాన్ నగర్​లో.. ఇలాగే ఇద్దరు యువకులు రహదారిపై హల్చల్ చేశారు. దీనికి సంబంధించిన వీడియో.. సామాజిక మాధ్యమాల్లో ఇప్పుడు వైరల్​గా మారింది.

రాజేంద్రనగర్ పీఎస్​ పరిధిలోని సులేమాన్ నగర్​లో.. రహదారిపై ఇద్దరు యువకులు హల్చల్ చేశారు. లాక్​డౌన్​ నిబంధనలకు విరుద్ధంగా.. అటుగా వస్తోన్న ఓ బైక్​ను పోలీసులు అడ్డుకున్నారు. ఆగ్రహానికి గురైన వాహనదారుడు.. తన సోదరుడితో కలిసి పోలీసులపై విరుచుకుపడ్డాడు. అంతటితో ఆగక.. వారిపై రాళ్ల దాడికి యత్నించాడు.

మాస్క్​, హెల్మెట్​ లేకుండా..

లాక్​డౌన్ సమయంలో ఇమాద్ నగర్ బస్తీలో పోలీసులు గస్తీ కాస్తూ ఉండగా.. కనీసం హెల్మెట్, మాస్క్ కూడా లేకుండా అటుగా వచ్చిన ఓ యువకుడి వాహనాన్ని పోలీసులు అడ్డుకున్నారు. ఆగ్రహించిన వాహనదారుడి సోదరుడు.. ఎదురు తిరగడమే కాకుండా వారిపై దురుసుగా ప్రవర్తించాడు. మా గ‌ల్లీకి వ‌చ్చీ.. మ‌మ్మ‌ల్నే ఆపుతారా అంటూ భూతులు తిట్టారు.

ఎవ్వ‌రినీ వ‌దిలిపెట్ట‌ం..

దాడికి పాల్పడిన వ్యక్తిని అరెస్టు చేసినట్లు రాజేంద్రనగర్ పోలీసులు తెలిపారు. లాక్డౌ​న్ నిబంధనలను ఉల్లంఘించిన ఎవ్వ‌రినీ వ‌దిలిపెట్ట‌బోమని హెచ్చ‌రించారు. కష్టకాలంలో అహర్నిశలు శ్రమిస్తోన్న పోలీసులపై.. పోకిరీలు ఇలా దాడులకు పాల్పడటం దారుణ‌మ‌ని పలువురు అభిప్రాయపడుతున్నారు.

ఇదీ చదవండి:లైవ్​ వీడియో: బైక్​పైకి దూసుకెళ్లిన ట్రాక్టర్​