Ghatkesar road accident cctv footage: మద్యం మత్తులో బైక్​ను ఢీ కొట్టిన కారు..

Ghatkesar road accident cctv footage: అతి వేగంతో పాటు మద్యం సేవించి వాహనం నడపడం ఓ మహిళ మృతికి కారణమయ్యాయి. బైక్​పై వెళ్తున్న భార్యాభర్తలను.. ఎదురుగా వస్తున్న కారు ఢీ కొట్టడంతో భార్య మృతి చెందగా, భర్తకు గాయాలయ్యాయి. మేడ్చల్​ జిల్లా ఘట్​కేసర్​ పరిధిలో ఈ ప్రమాదం చోటుచేసుకుంది. ప్రమాద దృశ్యాలు సీసీ కెమెరాల్లో నిక్షిప్తమయ్యాయి.

Ghatkesar road accident cctv footage: అతివేగం వద్దు, మద్యం సేవించి వాహనాలు నడపొద్దని ట్రాఫిక్​ పోలీసులు ఎంతగా హెచ్చరిస్తున్నా కొందరు వాహనదారుల తీరు మారడం లేదు. వారి నిర్లక్ష్యపు డ్రైవింగ్​కు ఎదుటి వారి ప్రాణాలు బలై పోతున్నాయి. అదీ రాత్రివేళల్లో కనీస జాగ్రత్తలు, అప్రమత్తత లేకుండా వాహనాలు నడుపుతుండటం భయాందోళనకు దారితీస్తోంది. మద్యం మత్తులో కారు నడిపి ఓ మహిళ మృతికి కారకులయ్యారు ఈ ఇంజినీరింగ్​ విద్యార్థులు. మేడ్చల్​ జిల్లా ఘట్​కేసర్​ పోలీస్​ స్టేషన్​ పరిధిలో ఈ ఘటన చోటుచేసుకుంది.

మద్యం మత్తులో

కళాశాల ముగిసిన తర్వాత కొందరు ఇంజినీరింగ్​ విద్యార్థులు.. మద్యం సేవించి కారులో బయలుదేరారు. అదే సమయంలో ఎదులాబాద్​కు చెందిన బత్తుల హనుమాన్ దాస్ గౌడ్​.. భార్య నిరంజనితో కలిసి ద్విచక్ర వాహనంపై ఘట్​కేసర్ నుంచి ఎదులాబాద్​కు వెళ్తున్నారు. ఈ క్రమంలో అతివేగంగా వచ్చిన కారు.. వారిని ఢీ కొట్టింది. దీంతో నిరంజని అక్కడక్కడే మృతి చెందగా.. హనుమాన్ దాస్ గౌడ్​కు గాయాలయ్యాయి. గమనించిన స్థానికులు అక్కడికి చేరుకుని క్షతగాత్రుడిని ఆస్పత్రికి తరలించారు.

ఇద్దరు పరారీ

ప్రమాదానికి కారణమైన విద్యార్థులు అదే కారులో పారిపోతుండగా స్థానికులు వారిని వెంబడించి పట్టుకున్నారు. ఏఎస్​ రావు నగర్​కు చెందిన సాయినిఖిల్​ రెడ్డి కారు నడుపుతుండగా.. అతడితో పాటు మరో విద్యార్థిని పట్టుకుని పోలీసు స్టేషన్​లో అప్పగించారు. మరో ఇద్దరు అక్కడి నుంచి పారిపోయారని స్థానికులు తెలిపారు. తప్పించుకున్న వారిని గుర్తించి మృతురాలి కుటుంబానికి న్యాయం చేయాలని డిమాండ్ చేస్తూ గ్రామస్థులు ఆందోళనకు దిగారు. వారికి పోలీసులు నచ్చచెప్పడంతో ఆందోళన విరమించారు.

ఇదీ చదవండి:Child Kidnap Drama: బంధువులకు దగ్గరవ్వాలని.. చిన్నారి కిడ్నాప్.. చివరకు..!