ప్రియుడిని రెచ్చగొట్టిన వివాహిత.. కోపంతో ఏం చేశాడంటే.!

Husband murdered due to Extra Marital Affair: వివాహేతర సంబంధం మోజులో వడి.. మద్యానికి బానిసైన భర్తను వదిలించుకోవాలని చూసింది ఓ భార్య. అందుకు ప్రియుడితో కలిసి పలుమార్లు పథకం కూడా రచించింది. కానీ అతని ఆయుష్యు గట్టిగా ఉండి అన్నిసార్లూ వారి ప్లాన్‌ ఫెయిలయింది. అసహనం కోల్పోయిన భార్య.. ప్రియుడిని రెచ్చగొట్టింది. తాగుబోతుని కూడా చంపలేవా అని హేళన చేసింది. దీంతో ఈ సారి గట్టిగా నిర్ణయించుకున్న ప్రియుడు.. మరొకరి సాయంతో ఆమె భర్తను ఎట్టకేలకు చంపించేశాడు. ఇదిలా ఉండగా ఈ కేసులో పోలీసులు దర్యాప్తు చేస్తుండగా మృతుడి భార్య పదే పదే దర్యాప్తు ఆపేయాలని కోరగా.. అనుమానం వచ్చిన పోలీసులు తీగ లాగారు. ఇంకేముంది డొంకంతా కదిలింది.

Husband murdered due to Extra Marital Affair: ప్రియుడితో కలిసి భర్తను హత్య చేసి ప్రమాదంగా చిత్రీకరించిన ఘటన ఏపీలోని విజయనగరం జిల్లాలో జరిగింది. అయితే ఈ కథలో ట్విస్ట్ ఏంటంటే దర్యాప్తు ఆపేయాలని మృతుడి భార్య పదే పదే కోరడంతో అనుమానం వచ్చిన పోలీసులు తీగ లాగడంతో డొంకంతా కదిలింది. అదనపు ఎస్పీ అనిల్‌కుమార్‌ కేసు వివరాలను వెల్లడించారు.

డెంకాడ మండలం డి.బాడువకు చెందిన డి.రామకృష్ణ (51) ఆటో నడుపుతూ వచ్చిన సొమ్మును మద్యం తాగేందుకు ఖర్చు చేసేవాడు. డబ్బులు లేకపోతే భార్య లక్ష్మిని అడిగేవాడు. ఆమె పైడిభీమవరంలోని ఫార్మా కంపెనీ క్యాంటీన్‌లో హెల్పర్‌గా పని చేస్తోంది. అదే కంపెనీలో సూపర్‌వైజర్‌గా చేస్తున్న పెద్ద తాడివాడకు చెందిన బి.దశకంఠేశ్వరరావుతో వివాహేతర సంబంధం కొనసాగిస్తోంది. లక్ష్మి అవసరాలకు అతనే డబ్బులు సమకూర్చేవాడు.

ఏడాది కిందట ఈ విషయం రామకృష్ణకు తెలియడంతో ఇంట్లో వారిద్దరి మధ్య ఘర్షణ చోటుచేసుకుంది. దీంతో తమ వివాహేతర సంబంధానికి అడ్డుగా ఉన్న రామకృష్ణను అడ్డు తొలగించుకునేందుకు పలుమార్లు ప్రయత్నించి విఫలమయ్యారు. నిరాశ చెందిన లక్ష్మి.. దశకంఠేశ్వరరావుతో వాగ్వాదానికి దిగింది. 'ఓ తాగుబోతుని చంపలేని నువ్వు దేనికి పనికొస్తావం'టూ రెచ్చగొట్టింది. దీంతో పౌరుషానికి దిగిన ప్రియుడు.. తన సహోద్యోగి పూసపాటిరేగ మండలానికి చెందిన జి.శంకరరావు సహాయంతో ప్రణాళిక రచించాడు. వంతెన పైనుంచి తోసేయాలని భావించారు.

గత నెల 2న పేరాపురం సమీపంలో ఆటో నడుపుతున్న రామకృష్ణకు ఫోన్‌ చేసి మద్యం తాగేందుకు దశకంఠేశ్వరరావు పిలిచాడు. రాత్రి 8 గంటల సమయంలో పిట్టపేట వైపు ఆటోలో వెళ్లి మద్యం తాగి తిరిగి పయనమయ్యారు. అనంతరం రామకృష్ణతో శంకరరావు గొడవకు దిగి ఆటోలో నుంచి తోసేశాడు. రోడ్డుపై పడిన రామకృష్ణ తలకు తీవ్రగాయమవడంతో అపస్మారక స్థితిలోకి వెళ్లి మృతి చెందాడు. మృతదేహాన్ని సీహెచ్‌ అగ్రహారం వద్ద పొలాల్లో పూడ్చాలనుకొని ఆ ప్రయత్నాన్ని విరమించుకున్నారు. ఆటోలో మృతదేహాన్ని పెట్టుకుని నాతవలస వంతెన పైనుంచి కిందకు తోసేందుకు యత్నించారు. ఆ సమయంలో ద్విచక్రవాహనం రావడంతో రోడ్డుపైనే ఆటోను తిరగేసి పరారయ్యారు.

రామకృష్ణ కుమార్తె.. తన తండ్రి మృతిపై ఫిర్యాదు చేయడంతో కేసు నమోదు చేసిన పోలీసులు దర్యాప్తు ప్రారంభించారు. దర్యాప్తును ఆపేయాలని లక్ష్మి పదేపదే పోలీసులను ఆశ్రయించడంతో అనుమానం వచ్చిన ఎస్‌ఐ జయంతి.. వారిని విచారించడంతో చంపింది తామేనని అంగీకరించారు. కేసును ఛేదించిన ఎస్‌ఐ ఆర్‌.జయంతి, కానిస్టేబుల్‌ దామోదరరావు, సిబ్బందిని అదనపు ఎస్పీ పి.అనిల్‌కుమార్‌ అభినందించారు.

ఇవీ చదవండి:జాబ్​లో చేరిన తర్వాతి రోజే నర్సుకు 'ఉరి'.. ఆస్పత్రిలోనే గ్యాంగ్​రేప్, హత్య!