కాగజ్​నగర్​లో దొంగల చేతివాటం.. ఏడున్నర తులాల బంగారం చోరీ

కుమురం భీం ఆసిఫాబాద్​ జిల్లా కాగజ్​నగర్ పట్టణంలో దొంగలు తమ చేతివాటం చూపించారు. ఓ వ్యక్తి ఇంట్లో చొరబడి సుమారు ఏడున్నర తులాల బంగారు ఆభరణాలు, రూ.15,000 నగదు ఎత్తుకెళ్లారు. బాధితుడి ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేస్తున్నారు.

కుమురం భీం ఆసిఫాబాద్​ జిల్లా కాగజ్​నగర్ పట్టణంలోని ఓ ఇంట్లో దొంగలు చోరీకి పాల్పడ్డారు. సుమారు ఏడున్నర తులాల బంగారు ఆభరణాలు, రూ.15,000 నగదు ఎత్తుకెళ్లారు.

కౌటాల మండలానికి చెందిన చంచల్ బిశ్వాస్ వృత్తిరీత్యా కాగజ్​నగర్ పట్టణంలోని ఈద్గా కాలనీలో కిరాయికి ఉంటున్నాడు. నాలుగు రోజుల క్రితం ఇంటికి తాళం వేసి.. సొంతూరుకు వెళ్లాడు. శనివారం ఉదయం ఇంటి యజమాని శ్రీనివాస్ వచ్చి చూడగా.. ఇంటి తలుపులు తెరిచి ఉన్నాయి. వెంటనే చంచల్ బిశ్వాస్​కు సమాచారం అందించాడు.

సమాచారం అందుకున్న పోలీసులు... ఘటనా స్థలికి చేరుకుని... జాగిలంతో అన్వేషించారు. క్లూస్ టీంతో ఆధారాలు సేకరించారు. చోరీ జరిగిన ప్రాంతాన్ని ఏఎస్పీ బాలస్వామి, పట్టణ ఎస్​హెచ్​వో మోహన్ సందర్శించి వివరాలు సేకరించారు. బాధితుడు చంచల్ బిశ్వాస్ ఇచ్చిన ఫిర్యాదు మేరకు దర్యాప్తు చేపట్టినట్లు ఎస్​హెచ్​వో మోహన్ తెలిపారు.