బిడ్డకు జన్మనిచ్చి.. కరోనాతో తల్లి మృతి

వరంగల్ గ్రామీణ జిల్లా కట్రాలలో కరోనా సోకి ఓ నిండు గర్భిణి ప్రాణాలు కోల్పోయింది. ఆడ శిశువుకు జన్మనిచ్చి మృత్యువాత పడింది. మౌనిక మృతితో కుటుంబసభ్యులు కన్నీరుమున్నీరుగా విలపిస్తున్నారు.

వరంగల్ గ్రామీణ జిల్లాలో కరోనా చాపకింద నీరులా వ్యాపిస్తోంది. మహమ్మారి బారిన పడిన ఓ నిండు గర్భిణి ఆడ శిశువుకు జన్మనిచ్చి మృత్యువాత పడింది. ఈ విషాద ఘటన వర్ధన్నపేట మండలం కట్రాల గ్రామంలో చోటుచేసుకుంది. గత పది రోజుల క్రితం నిండు గర్భిణి పాముల మౌనిక(21)కి కరోనా పరీక్షలు నిర్వహించగా పాజిటివ్ వచ్చింది. వైద్యుల సలహా మేరకు ఇంటివద్దే ఉంటూ చికిత్స పొందింది.

ఈ క్రమంలోనే మౌనికకు పురిటి నొప్పులు రావడంతో వరంగల్ సీకేఎం ఆసుపత్రికి తరలించారు. వైద్యులు ఆమెకు ఆపరేషన్ నిర్వహించగా ఆడ శిశువు జన్మించింది. అనంతరం మౌనిక తీవ్ర అస్వస్థతకు గురైంది. వెంటనే వరంగల్ ఎంజీఎంకు తరలించారు కుటుంబసభ్యులు. అక్కడ చికిత్సపొందుతూ ఈ తెల్లవారు జామున మృతి చెందింది. మౌనిక మృతితో కుటుంబసభ్యులు కన్నీరుమున్నీరుగా విలపిస్తున్నారు.

ఇదీ చదవండి :రెండు రోజులుగా కఠినంగా లాక్​డౌన్​ అమలు