suicide: ఫెయిల్​ అవుతానన్న భయంతో విద్యార్థి ఆత్మహత్య!

ఫెయిల్​ అవుతానన్న భయంతో ఓ విద్యార్థి విషం తాగి ఆత్మహత్య చేసుకున్నాడు. ఈ ఘటన తమిళనాడులోని కోయంబత్తూరు జిల్లాలో జరిగింది.

తమిళనాడులోని కోయంబత్తూరు జిల్లా పొల్లాచ్చి పక్కనే ఉన్న ముత్తూరు ప్రాంతానికి చెందిన కీర్తివాసన్(20) బలవన్మరణానికి పాల్పడ్డాడు. కీర్తివాసన్ ఇటీవలే నీట్ ప్రవేశ పరీక్ష రాశాడు. అయితే ఫలితాలు త్వరలోనే వెల్లడికానున్న క్రమంలో ఫెయిల్​ అవుతానన్న భయంతో విషం తాగి ఆత్మహత్య చేసుకున్నాడు.

కీర్తివాసన్ 12వ తరగతి పూర్తి చేసి నీట్​ పరీక్షకు సిద్ధమవుతున్నాడు. ఇంతకుముందు మూడుసార్లు నీట్ పరీక్షలో ఫెయిల్ అయిన అతను.. ఇటీవలే నాలుగోసారి పరీక్ష రాశాడు. పరీక్ష ఫలితాలు విడుదల కావాల్సి ఉంది. నీట్​ పరీక్షలో అడిగిన ప్రశ్నలు క్లిష్టంగా ఉన్నాయని.. ఈసారి కూడా ఫెయిల్​ అయే అవకాశం ఉందని తరచూ బాధపడేవాడని తెలుస్తోంది.

ఈ క్రమంలో అక్టోబర్ 29 సాయంత్రం ఇంట్లో ఎవరూ లేని సమయంలో విషం తాగాడు. ఆ తర్వాత తల్లికి ఫోన్‌ చేసి చెప్పాడు. స్థానికుల సాయంతో కీర్తివాసన్​ను మొదట పొల్లాచ్చి ప్రభుత్వాసుపత్రికి తరలించారు. అనంతరం కోయంబత్తూరు ప్రభుత్వాసుపత్రికి తరలిస్తుండగా మార్గమధ్యలో మృతి చెందాడు.

ఇదీ చూడండి:లోయలో పడ్డ వాహనం- 13 మంది దుర్మరణం