Fire Accident Gymkhana Ground Vijayawada: విజయవాడ గాంధీనగర్ జింఖానా మైదానంలోని బాణసంచా దుకాణంలో అగ్నిప్రమాదం ఒక్కసారిగా ఉలిక్కిపడేలా చేసింది. దీపావళి వేళ దుకాణాలు ఏర్పాటు చేసి.. టపాసులు సమకూర్చుకొనే పనిలో దుకాణదారులు ఉన్నారు. ఇంతలో ఓ దుకాణం వద్ద టపాసులు దించుతుండగా ఒక్కసారిగా అగ్నిప్రమాదం సంభవించింది. దీంతో చుట్టుపక్కల ఉన్నవారంతా పారిపోగా.. దుకాణంలో ఉన్న బ్రహ్మ, కాశీ అనే ఇద్దరు కార్మికులు అక్కడిక్కడే మృతిచెందారు.
ఈ ప్రమాదంలో 15, 16, 17వ నంబర్‌ దుకాణాలు అగ్నికి ఆహుతి అయ్యాయి. 18వ నంబర్‌ దుకాణం పాక్షికంగా దగ్ధమైంది. పేలుడు ధాటికి స్థానికులు భయాందోళన చెందారు. ఇళ్లల్లో నుంచి బయటికి పరుగులు తీశారు. ప్రమాదం జరిగిన వెంటనే స్పందించిన పోలీసులు, అగ్నిమాపక అధికారులు.. నాలుగు ఫైరింజన్లతో మంటలను అదుపు చేశారు. ఏ మాత్రం ఆలస్యమైనా మైదానంలోని 20 షాపులు దగ్ధమయ్యేవని స్థానికులు తెలిపారు.