బస్వాపురం జలాశయం నిర్మాణంలో ముంపునకు గురైన నష్టపరిహారం అందకపోవడంతో ఆత్మహత్యాయత్నం చేసిన వ్యక్తి మృత్యువాత పడ్డాడు. దీంతో మృతదేహంతో ప్రాజెక్టు వద్ద బంధువులు ఆందోళనకు దిగారు. యాదాద్రి భువనగిరి జిల్లా భువనగిరి మండలం బి.ఎన్. తిమ్మాపూర్కు చెందిన సతీశ్ గత నెల 10 వ తేదీన ఆత్మహత్యకు యత్నించాడు. తన ఆటోతో పాటు పెట్రోల్ పోసుకుని నిప్పంటించుకున్నాడు. తీవ్ర గాయాలపాలైన అతన్ని హైదరాబాద్లోని ఓ ఆసుపత్రికి తరలించగా చికిత్స పొందుతూ ఈరోజు మృతి చెందాడు.
బంధువుల ధర్నా
అతని మరణంతో ఆగ్రహానికి గురైన మృతుడి బంధువులు, గ్రామస్థులు బస్వాపురం ప్రాజెక్టు నిర్మాణం వద్ద సతీశ్ మృతదేహంతో ధర్నాకు దిగారు. మృతుని కుటుంబానికి న్యాయం చేయాలని ప్రాజెక్టు వద్దే బైఠాయించారు. ఈ పరిణామాలతో పోలీసులు ప్రాజెక్టు వద్ద భారీ బందోబస్తు ఏర్పాటు చేశారు.
స్థానికులు తెలిపిన వివరాల ప్రకారం...
భువనగిరి మండలం బి.ఎన్. తిమ్మాపూర్ గ్రామానికి చెందిన పిన్నం సతీశ్కు 12 ఎకరాల భూమి ఉండగా, అందులో 9 ఎకరాల విషయంలో వివాదం నడుస్తోంది. ఆ భూమి మరో వ్యక్తి పేరుతో నమోదైంది. దీంతో వారి మధ్య ఏర్పడిన వివాదాన్ని గ్రామ పెద్దలు ఒప్పంద పత్రం రాయించి సమస్యను పరిష్కరించారు. భూమిలో 75 శాతం పరిహారం సతీశ్కు అందాల్సి ఉండగా... గత మూడు నెలలుగా పరిహారం కోసం ప్రభుత్వ కార్యాలయాల చుట్టూ తిరిగాడు. వెంటనే ఖాతాలో నగదు జమ చేస్తామని అధికారులు హామీ ఇచ్చినా.. జమ కాకపోవడంతో విసిగిపోయి ఆత్మహత్యాయత్నం చేశాడని స్థానికులు పేర్కొన్నారు. మృతునికి భార్య, కూతురు, కుమారుడు ఉన్నారు. మృతుని కుటుంబానికి న్యాయం చేయాలని ప్రాజెక్టు వద్ద బంధువులు, గ్రామస్థులు మృతదేహంతో ధర్నా నిర్వహించారు.